ស្នេហ៍អមតៈ

Wednesday, September 18, 2013

គន្លឹះ 3 យ៉ាង ដើម្បីសម្រេចគោលដៅអាជីវកម្មរយៈពេលខ្លី

ការខិតខំប្រឹងប្រែងអភិវឌ្ឍ តែងតែផ្តោតទៅលើមធ្យោបាយ ឬវិធីសាស្ត្រ ដែលអាចឱ្យលោកអ្នកសម្រេចគោលដៅនៃអាជីវកម្មរបស់អ្នកលើសពីការគ្រោងទុក ពេលគឺជោគជ័យក្នុងរយៈពេលដ៏ខ្លី។ ទោះជាយ៉ាងណា គឺត្រូវមានការសម្រេចជោគជ័យ ដើម្បីឈានទៅរកការប្លាស់ប្តូរ និងរៀបចំសេចក្តីប្រាថ្នា ឬគោលដៅរយៈវែង ជាបន្តបន្ទាប់។ ខាងក្រោមនេះ ជាវិធីបន្ទាន់ 3 យ៉ាងក្នុងការកសាងនូវអំណាចជ្រើសរើសនៃមុខជំនួញរបស់អ្នកពីអតិថិជន៖

ពង្រីងសក្តានុពល (ភាពខ្លាំង) ៖ ធ្វើឱ្យកាន់តែច្រើន នូវអ្វីដែលអ្នកធ្វើបានល្អ។ ភាពរវាសរវៃក្នុងអាជីវកម្ម វាបង្កើតសតិលើការព្យាយាមសព្វគ្រប់បែបយ៉ាង និងជំរុញធ្វើឱ្យប្រសើរឡើងនូវចំណុចខ្សោយ ប៉ុន្តែចំណុចពិត វាធ្វើឱ្យកាន់តែប្រសើរឡើង ដោយផ្តោតទីលើចំណុចខ្លាំងរបស់អ្នក។
ពង្រឹកនូវ “ យីហោ (ម៉ាក ឬផ្លាកសញ្ញា) ” របស់ក្រុមហ៊ុន ឬអាវីកម្មរបស់អ្នក ៖ ជ្រើសរើស សកម្មភាពការងារខាងក្រៅ ដើម្បីអភិវឌ្ឍរូបភាព (កសាងកេរ្តីឈ្មោះ) ដល់កន្លែងដែលអ្នកចង់ទៅកាន់។ ឧទាហរណ៍៖ អ្នកធ្វើការស្ម័គ្រចិត្តឱ្យសាលាមួយ នឹងធ្វើការប្រតិបត្តិបានល្អ ប្រសិនបើអ្នកពូកែរៀបចំគម្រោង។ បង្កើនបទពិសោធទូទៅ និងវិធីសាស្ត្រនៃការសន្ទនា ដើម្បីពង្រឹងសមត្ថភាពក្នុងការងារ។
បង្កើតបរិបទឱ្យភាពជោគជ័យ៖ ជាមួយនឹងមនុស្សជុំវិញខ្លួនរបស់អ្នក អ្នកត្រូវធ្វើការងាររបស់អ្នកឱ្យបានល្អ។ ជាធម្មតា អ្នកដទៃ នឹងទទួលស្គាល់តម្លៃ និងគោលដៅ មុនពេលដែលពួកគេចង់ចែករំលែកនូវអ្វីដែលពួកគេបានដឹង ដូច្នេះ សូមវិនិយោគ ទៅលើទំនាក់ទំនងនេះ៕

៥ចំណុច ដែលនិយោជិតចង់បានពីអ្នកគ្រប់គ្រង

ភារកិច្ចរបស់អ្នកគ្រប់គ្រងម្នាក់ គឺថែរក្សាមនុស្សដែលនៅក្រោមបង្គាប់ធ្វើការ ឆ្ពោះទៅរកទិសដៅ មួយ។ ដូច្នេះហើយវាគឺជាស្នូល ដែលពួកគេត្រូវតែងស្វែងយល់នូវអ្វីដែលពួកគេចង់បាន។ ខាងក្រោមនេះ វិធី ៥ចំណុច ដែលនិយោគជិកចង់បានពីអ្នក គ្រប់ គ្រងរបស់ខ្លួន៖

1.ប្រាប់ពួកគេជាមុន៖ វាប្រហែលជាមិនសូវសំខាន់ក្នុងការប្រាប់កូនចៅរបស់ខ្លួន នៅរាល់មុនការសម្រេចចិត្តបង្កើនអ្វីមួយក្នុងមុខជំនួញ ផ្ទុយទៅវិញត្រូវឲ្យអ្នកក្រោមឱវាទបានដឹងនូវរាល់ទិសដៅ និងរាល់ព្រឹត្តិការណ៍ដែលកើតមាននៅក្នុងក្រុមហ៊ុន។ ការខ្វះខាតនៅទំនាក់ទំនងពីអ្នកគ្រប់គ្រងអាចធ្វើឲ្យអ្នកនៅក្រោមឱវាទ មានអារម្មណ៍ថា ពួកគេគឺគ្រាន់តែជាគ្រាប់ឡុកឡាក់ នៅក្នុងម៉ាស៊ីនមួយ ដែលធ្វើឲ្យលទ្ធផលមានការធ្លាក់ចុះ។ ហេតុនេះដើម្បីបង្កើននូវប្រសិទ្ធិភាពត្រូវតែផ្តល់ដំណឹងជូនពួកគេ ជាមុន នោះនឹងទទួលបានលទ្ធផលវិជ្ជមាន។

2.រាប់អានពួកគេដោយយុតិ្តធម៌៖ ការរើសអើងនៅក្នុ្ងងសង្គមការងារ គឺត្រូវបានគេលើកយកមកពិភាក្សានៅក្នុងបរិបទនៃប្រធានបទចំរូងចម្រាស់ ដូចជា ពូជសាសន៍ និងភេទ។ ផ្ទុយទៅវិញការរើសអើង សម្រាប់ហេតុផលជាច្រើនអាចបង្កឲ្យមានលទ្ធផលធ្លាក់ចុះនៃសីលធម៌និយោ ជិក។ ជាឧទាហរណ៍ដែលល្អក្នុងការលុបបំបាត់ការរើសអើង អាចបង្កឲ្យមានប្រសិទ្ធិភាពនៃចរិតលក្ខណៈល្អ របស់អ្នកគ្រប់គ្រង។

3.ស្តាប់អ្វីដែលពួកគេព្រួយបារម្ភ៖ សតិអារម្មណ៍ និងគំនិតអាចនឹងផ្ទុះឡើង តវ៉ា នៅពេលដែលលែងមានការអត់ធ្មត់។ វាគឺជាឧទារណ៍មួយសាមញ្ញ ដែលអ្នករាល់គ្នា នឹងមិនសប្បាយរីករាយនៅក្នុងបរិយាកាស កន្លែងធ្វើការ។ អ្វីដែលសំខាន់គឺបង្ហាញឱកាសទៅកាន់និយោជិករបស់ខ្លួនដើម្បីសម្តែង នូវរាល់ការព្រួយបារម្ភដែលពួកគេមាន។ បង្កើតជាប្រអប់មួយសម្រាប់ដាក់នៅរាល់សំណើរនៅត្រង់មាត់ច្រកចូលនៃ ការិយាល័យធ្វើការ ដើម្បីទទួលសំនូមពរ ឬការស្ថាបនាផ្សេង។

4.មិនត្រូវប្រើរបៀបគ្រប់គ្រងតឹងរឹងពេកនោះទេ៖ ការគ្រប់គ្រងតឹងតែងពេកនោះ នឹងធ្វើឲ្យនិយោជិកស្អប់អ្នក។ វាគឺពិតជាសំខាន់ខ្លាំងណាស់ក្នុងការយល់ដឹងអំពីវា។ លុះត្រាតែលោកអ្នកសកម្មក្នុងការបណ្តុះបណ្តាលបុគ្គល វាគ្មានហេតុផលដែលត្រូវប្រាប់បុគ្គលិករាល់គ្រប់អ្វីៗដែលយើង ត្រូវធ្វើនោះទេ។

5.ដាក់ការងារ និងទំនួលខុសត្រូវដល់ពួកគេ៖ វាហាក់បីដូចជាប្លែក ប៉ុន្តែអ្នកគ្រប់គ្រងទាំងនោះភ្លេចថាបុគ្គលល្អៗពិតជាចង់ទទួលបាននូវ ការងារមួយសម្រាប់ធ្វើមិនត្រឹមតែការខ្វះខាតសកម្មភាពនូវទំនួល ខុសត្រូវអូសបន្លាយការងារធ្វើឲ្យពីមួយថ្ងៃទៅមួយថ្ងៃ ប៉ុន្តែប្រសិនបើគ្មានគោលដៅ ឬអារម្មណ៍នៃការសម្រេចចិត្តបុគ្គលនោះនឹងមានអារម្មណ៍ថាស្រងាកចិត្ត ជាមួយនឹងការងាររបស់ពួកគេ។ ដាក់ភារៈកិច្ចឲ្យពួកគេមានការប្រជុំ ឬបណ្តុះបណ្តាលពួកគេ។ ជាការពិតណាស់ វាមិនមែនជាតារាងចាត់ចែងដែលប្រើអស់ថ្លៃនោះទេ តែត្រូវធានាឲ្យបានថា ដើម្បី ប៉ាន់ប្រមាណនូវបុគ្គលរបស់អ្នកផ្ទាល់ក្នុងការប្តេជ្ញាចិត្តនូវ អ្វីដែលចង់បាន ឬការព្រួយបារម្មណ៍នូវអ្វីដែលពួកគេមាន។ នោះជាអ្នកគ្រប់គ្រងគឺជាតួនាទី របស់អ្នកដែលត្រូវបង្រៀនគេក្នុងការសម្រេចចិត្តភ្លាមៗ នោះការងារលោកអ្នកនិងដំណើរការយ៉ាងរលូន៕

វិធីសាស្ត្រ7យ៉ាងសម្រាប់អ្នកធ្វើការនៅការិយាល័យ

នៅក្នុងបណ្តាឆ្នាំសេដ្ឋកិច្ចធ្លាក់ចុះ ការគោរពគោលការនៅកន្លែងការងារបានក្លាយទៅជាការ សំខាន់ជាងពេលណាៗទាំងអស់។ ការពិសោធបានបង្ហាញថា ឥរិយាបថ និងគោលការការិយាល័យគឺជាកត្តាមិនអាចខ្វះបានដើម្បីរក្សាតំណែងក្នុង ក្រុមហ៊ុន។ ខាងក្រោមនេះគឺជាវិធីសាស្ត្រក៏សំខាន់ៗមួយចំនួនដែលអាចជួយអ្នកក្នុង សម្រេចបាននូវគោលដៅនៃការងារ។

-អាកប្បកិរិយាៈ បើទោះជាមានរឿងអ្វី កើតឡើង អ្នកគួរតែរក្សាអាកប្បកិរិយាឲ្យបានល្អ។ បញ្ហាណាក៏ដោយដែលកើតមានចំពោះជីវិតឯកជន អ្នកត្រូវទុកមួយឡែកហើយត្រូវផ្តោតអារម្មណ៍ទៅលើការងារនៅការិយាល័យ។

-មិនជជែកគ្នាក្នុងការិយាល័យៈ ចូរ ប្រុងប្រយ័ត្នជាមួយមនុស្សដែលនិយមចូលចិត្តអុជអាលគេ។ ការជជែកគ្នាច្រើនអាចជះឥទ្ធិពលអាក្រក់ដល់ការងាររបស់អ្នក នេះមិនទាន់គិតដល់ប្រការដែលអ្នកអាចធ្វើឲ្យខូចខាតដល់ប្រយោជន៍អ្នក ដ៏ទៃ។ ចូរជួយជ្រោមជ្រែងមិត្តរួមការងារដើម្បីឲ្យពួកគេអាចធ្វើការ ប្រកបដោយជោគជ័យ បើទោះជាអ្នកមិនចូលចិត្តពួកគេក៏ដោយ។ អ្នកមិនចំណាយពេលវេលាក្នុងការងារដែលពុំមានប្រយោជន៍ ហើយជំនួសមកវិញ អ្នកគួរធ្វើការងារណាដែលមានប្រយោជន៍ដល់ខ្លួន និងអ្នកដទៃ។

-បំពេញការងារឲ្យបានល្អជាងការស្នើសុំៈ ស្វែងរកវិធីសាស្ត្រដែលមានប្រសិទ្ធភាពដើម្បីបំពេញការងារឲ្យបានល្អេ ជាង និងអស្ចារ្យជាងការដែលមេរបស់យើងណែនាំទៅទៀត។ ចំពោះអ្នកដែលចង់បានស្នាដៃច្រើនក៏គួរតែខិតខំធ្វើឲ្យបានច្រើនជាង មុន។ ចូរធ្វើខ្លួនឲ្យក្លាយជាអ្នកសកម្មហើយកុំចេះតែនៅរង់ចាំបញ្ជាពីមេ ឬអ្នកដទៃ។ អ្នកគួរតែជាអ្នកហ៊ានគិតហ៊ានធ្វើ។

-ការចូលរួមៈ អ្នកត្រូវតែធានាថា អ្នកមិនបង្កការលំបាកនៅពេលបំពេញការងារ។ ចូរខំប្រឹង និង ត្រូវចេះចូលរួមមតិ និង បំពេញការងារ ពេលនោះអ្នកនឹងមានមោទកភាពចំពោះចំណែកចូលរួមរបស់ខ្លួន។

-វាយតម្លៃចំពោះអ្នកដទៃៈ ចូរបង្ហាញឲ្យអ្នកដទៃដឹងថា អ្នកឲ្យតម្លៃខ្ពស់ដល់អ្នកដទៃខណៈ ដែលអ្នកបានរួមសហការជាមួយពួកគេ។ ក្នុងករណីដែលអ្នកយល់ឃើញថា អ្នកណាម្នាក់មានការចូលរួម តែមិនសមតាមបំណងរបស់អ្នកនោះ អ្នកគួរតែវាយតម្លៃពួកគេឲ្យនៅក្នុងកម្រិតដែលមានលក្ខណៈជាការ ចូលរួមស្ថាបនាដូច្នេះវាប្រសើរជាងការបង្ហាញពីកំហឹង និងការក្តៅក្រហាយ។

-កុំទៅយឺតយ៉ាវៈ ចូរកុំយឺតយ៉ាវ ក្នុងការណាត់ជួបកិច្ចប្រជុំ ការឆ្លើយតបទូរស័ព្ទ ឬ អ៊ីម៉ែល។ ការប្រតិកម្មទាន់ពេលគឺជាការបង្ហាញនូវកាយវិការធ្វើការប្រកបដោយ វិជ្ជាជីវៈ។ ការគោរពការណាត់ជួបក៏អាចបង្ហាញថា អ្នកគោរពពេលវេលារបស់ខ្លួន ចូរកុំខ្ជះខ្ជាយវា ព្រោះតែការមកយឺត។

-ឆ្លាតវៃខាងសរសេរៈ ស្តាប់ទៅ ហាក់ដូចជាការងាយស្រួល ប៉ុន្តែអ្វីដែលអ្នកសរសេរគឺមានកំហុសផ្នែកអក្ខរាវិរុទ្ធ និងប្រកបខុសទាំងស្រុងក្នុងលិខិតដែលអ្នកត្រៀមនឹងផ្ញើជូនមេ ឬអ្នកដទៃ។ បែបនេះវាទៅជាយ៉ាងណា? ប្រការនេះនឹងកាត់បន្ថយការសម្តែងមតិ ឬការលើកឡើងរបស់អ្នក ហើយវានឹងមិនជួយឲ្យអ្នកមានការរីកចម្រើនទេ។ អ្នកគួរតែប្រើប្រាស់ជំនួយផ្សេងៗ មានដូចជាវចនានុក្រមជាដើម ដើម្បីជួយឲ្យការសរសេររបស់អ្នកប្រកបដោយភាពត្រឹមត្រូវ៕

កិច្ចការ ១០យ៉ាង ដែលសិស្សនិស្សិត គួរធ្វើក្នុងពេលកំពុងសិក្សារ

១. គ្រប់គ្រងពេលវេលាសិក្សាប្រកបដោយប្រសិទ្ធភាព
២. ប្រកាន់ខ្ជាប់នូវទម្លាប់ល្អ៖ មើលមេរៀន ធ្វើកិច្ចការសាលាដែលគ្រូដាក់ឲ្យ និង មករៀនជាទៀងទាត់
៣. រៀនត្រូវមានទិសដៅជាស្រេចថាខ្លួនចង់បានត្រឹមណា
៤. ផ្ចង់អារម្មណ៍សិក្សានិងស្តាប់គ្រូពន្យល់បើមិនយល់ត្រង់ណាត្រូវហ៊ានសួរភ្លាម
៥. កត់ត្រាខ្លឹមសារមេរៀនសំខាន់ៗ
៦. ធ្វើកិច្ចការសាលាដែលគ្រូដាក់ឲ្យ ចូរចងចាំថាគ្រូដាក់លំហាត់ឲ្យធ្វើគឺសុទ្ធតែមានមូលហេតុ។ មូលហេតុនោះគឺធ្វើឲ្យអ្នកចេះដឹង។
៧. រំលឹកមេរៀនជារៀងរាល់ថ្ងៃ កុំរង់ចាំរហូតជិតដល់ថ្ងៃប្រឡងទើបមើលមេរៀន
៨. រៀបចំរបស់របរឲ្យមានរបៀបរៀបរយ បែងចែកកន្លែងទុកដាក់របស់ ហើយទុកដាក់របស់ឲ្យត្រូវកន្លែង
៩. រៀនដោយមានទឹកចិត្តចង់រៀន
១០. តាំងចិត្តរៀន តាំងចិត្តធ្វើយ៉ាងពិតប្រាកដ ព្យាយាមសិក្សា
ជោគជ័យនៅចំពោះអ្នក! ប្រភព salarean

Tuesday, September 17, 2013

របៀបរកស៊ី បោកប្រាសរបស់ក្រុមហ៊ុនមួយចំនួន

មាន ក្រុមហ៊ុនមួយចំនួនយកវិធីពីរាមីតមកបោកប្រាសខ្មែរស្ទើរតែគ្រប់ គ្នា ។ ពួកគេប្រើទៅលើការលក់ជាបណ្ដាញ អាចក្លាយជាសមាជិកជាបណ្ដាញបានទាល់តែទិញផលិតផលរបស់គេមួយ ឬច្រើន សូមបញ្ជាក់ថាផលិតផលនោះលក់ក្នុងតម្លៃខ្ពស់ណាស់ ហើយភាគច្រើនក្រុមហ៊ុនរកផលិតផលណាដែលមិនទាន់មាននៅក្នុងស្រុក ទៀត ។ ចំពោះអ្នកដែលបានទិញផលិតផលវិញតម្រូវឲ្យរកអ្នកទិញបានពីរនាក់ ទៀតសម្រាប់ដាក់ក្រោមបណ្ដាញរបស់ខ្លួន ដោយដាក់ឆ្វេងមួយ និងស្ដាំមួយ ហើយអ្នកដែលបានទិញទៀតសោដក៏ត្រូវក៏ធ្វើដូចអ្នកមុនៗអញ្ចឹងដែរ ជារៀងរហូតទៅ ។ អ្នកដែលជាសមាជិកពេលដែលមានបណ្ដាញខាងក្រោមច្រើន និងទទួលបានកម្រៃ ទៅតាមការកំណត់របស់ក្រុមហ៊ុន ។ ត្រង់នេះជាចំណុចទាក់ទាញ មនុស្សចូលរួមជាច្រើន ។ តែអ្នកទាំងនោះមិនបានគិតទេថាជាការបោកប្រាសមួយយ៉ាងស៊ីជម្រៅ ដែលស្មានមិនដល់ ។
សួរថាបោកនៅកន្លែងណា ៖
លក់ផលិតផលក្នុងតម្លៃខ្ពស់ (ពាក្យខ្មែរថាលក់កោរ) ហេតុអីបានលក់ដូច្នេះ? ព្រោះត្រូវដកលុយនោះទុកឲ្យតម្លៃជើងសារបកមកសមាជិកខ្លះវិញ និងក្រុមហ៊ុនចំណេញខ្លះ ។
គេប្រើសមាជិកឲ្យរកអ្នកទិញឲ្យគេបន្តទៀត ។ សួរថាអ្នករកបានមនុស្សពីណា? មានតែមិត្តភ័ក្ដិ បងប្អូន អ្នកស្គាល់គ្នា និងក្រុមគ្រួសារ។
ចុះមនុស្សដែលអ្នកខំរកបាននោះអាចមានលទ្ធភាពរកមនុស្សបានដែរទេ? កាលណាមិនបានគាត់មិនត្រូវចំណាយលុយដែលលើសពីតម្លៃធម្មតានោះ ចោលទទេៗទៅហើយ ។ បើគិតពីចំនួនលុយវិញ បើមនុស្សម្នាក់ដូចជាមិនច្រើនទេ តែមនុស្សកាន់តែច្រើនវិញវាមិនរឹតតែច្រើនហើយទេ ។
អ្នកដែលជាសមាជិកស្ថិតនៅក្រោមជើងសារក្រោមគេ បង្អស់ ឬអ្នកដែលរកសមាជិកមិនបាន មិនសុទ្ធតែជាអ្នកចំណាយលុយចោលទទេ ៗ ទៅហើយ ។ ព្រោះមនុស្សនៅក្នុងស្រុកមានចំនួនកំណត់ច្បាស់លាស់ ហើយអ្នកដែលអាចមានលទ្ធភាពទិញក៏មានចំនួនកំណត់ដែរ ។ ក្រុមគាត់សុទ្ធតែចាញ់បោកគេ ។
អ្នកទទួលផលមានចំនួនតិចជាងអ្នកត្រូវចាញ់បោកគេ ហើយរឿងអកុសលនោះអ្នកក៏បានចូលរួមបោកប្រាស ឲ្យគេដែរដោយមិនដឹងខ្លួន ដោយគ្រាន់តែទទួលបានប្រាក់លើកទឹកចិត្តបន្តិចបន្ទួចតែប៉ុណ្ណោះ ។

ខ្មែរយើងឥឡូវសំបូរ Hacker មិនធម្មតាទេ

សួស្ដីអ្នកទស្សនាប្លកអាក្បាលធំជាទីមេត្រី ខ្ញុំសូមនិយាយអំពី Hacker នៅស្រុកខ្មែរ និង ហេតុការណ៍ជាក់ស្ដែងនានាដែរបានកើតកន្លងមក។ ប្រជាជនខ្មែរដែរបានតាមដានពត៌មានតាមការសែត ប្រហែលជាបានជ្រាបរឿង Hacker ធ្វើអោយវ៉ែបសាយ សារព័ត៌មាន ដើមអម្ពិល, កោះសន្តិភាព Error ផ្អាកដំណើរការជាច្រើនដងមកហើយ។

     តែពេលនេះខ្ញុំចង់និយាយពី Hacker កំពុងតែសប្បាយនឹងការវាយប្រហារមិនរើសមុខ
មិនរើសទីកន្លែង ថ្មីៗនេះ វ៉េបសាយ រៀនដើម្បីខ្មែរ ដែរ ជាវ៉េបសាយបង្កើតឡើងដោយមនុស្សសាមញ្ញម្នាក់ សរសេរអំពី ព្រឹត្តិការសង្គមជាក់ស្ដែង ចែករំលែកចំណេះដឹងបទពិសោធន៍ ទូទៅនានា ដោយមិនគិតពីផលចំណេញម៉ាកាក់ម៉ាសេននោះ ត្រូវបាន Hacker ឆ្លៀតធ្វើបាបមិនដោយគ្មានគិតអ្វីទាំងអស់ គ្មានគិតថាជាខ្មែរដូចគ្នា គិតធ្វើយ៉ាងម៉េចអោយតែអាច hack កើតគឺ hack ភ្លាម។ មិនត្រឹមតែប៉ុណ្ណោះ ថែមទាំងម្ចាស់វ៉េបសាយនោះ (Samady KS) បានអំពាវនាវអោយ (សុំអង្វរករ)អោយបងៗ Hacker មេត្តាអាណិតកុំធ្វើបាបអី សូមមើល ទំព័រ Learn for Khmer តូចតាចមួយសោះ ក៏ក្រុម Hacker ព្យាយាមបំផ្លាញដែរ. អីយ៉ា!!!!! ត្រូវគេធ្វើបាបហើយស្រែកសុំអង្វរគេទៀត នេះហើយ!! គឺជាពិភពបច្ចេកវិទ្យា បើយើងគ្មានឬមិនទាន់មានសមត្ថភាពអាចទប់ទល់វិញបានទេមានតែផ្លូវមួយគត់គឺ ""សុំអង្វរ"" ។ និយាយពី រៀនដើម្បីខ្មែរ គឺមិនមែនត្រូវគេធ្វើបាបលើកទីមួយនោះទេ គឺ កាលពីមុន រៀនដើម្បីខ្មែរ ស្ថិតនៅជាប្លក ក្នុងពិភពប្លកខ្មែរនៅ Wordpress នៅឡើយ។ នៅទីនោះ រៀនដើម្បីខ្មែរ បានចូលរួមចែករំលែកចំណេះដឹងយ៉ាងសកម្មបំផុត មានចំនួនអ្នកចូលមើល មហាច្រើន សឹងថារាប់ម៉ឺន រាប់ពាន់ដង់ក្នុងមួយថ្ងៃៗ តែជាអកុសលប្លក រៀនដើម្បីខ្មែរ ត្រូវខាង Wordpress បិទដោយមិនប្រាប់មូលហេតុ។ បើតាមខ្ញុំស្មានប្រាកដជាមានអ្នក Report (រាយការណ៍) 100% ទើបបានជា Wordpress សំរេចចិត្តបិទ តែក៏មិនអាចបញ្ឈប់ កំលាំងចិត្ត Samady KS បានដែរ គឺ បង្កើតវ៉េបសាយមួយដោយខ្លួនឯងនិងលែងខ្លាចអ្នក Report ទៀតដែរ។

លោក ជី សុផាត ដែរជាអ្នកអភិបាលនៅ ក្រុមចែកគ្នានិយាយអំពី IT ក៏ត្រូវបានបិទក្នុងរយៈពេលតែ ៥ ថ្ងៃតែប៉ុណ្ណោះ អ្នកណាមិនក្តៅ!!។ សូមមើលអារម្មណ៍របស់គាត់ ហេតុអ្វីអ្នកនៅបន្តប្រើ WordPress ទៀត? ។

    ចំនែករឿងរបស់ខ្ញុំវិញគឺ បន្ទាប់ពីបានបោះលេណដ្ឋានបាន២ថ្ងៃ ស្រាប់តែជួបរឿងមួយធ្វើអោយខ្ញុំរាងធុងបែកញើសតិចៗដែរ គឺទទួលបានសារព្រមានថា ខ្ញុំធ្វើខុសលក្ខខណ្ឌរបស់ Blogspot តែសំណាងវិញ នៅអាចប្រើបានទៀតអត់អី ហាស ហា នេះបើសិនជានៅ Wordpress វិញប្រហែលជាគេខ្វៃទៀតបានទៀហើយ។ តែខ្ញុំក៏មិនទាន់ហ៊ានថាយ៉ាងម៉េចដែរ ងៃណាមួយប្រហែលជាជៀសមិនរួចក៏ថាបាន ។

   ចំនែកឯគណនី Facebook របស់ខ្ញុំដែរប្រើរាល់ថ្ងៃស្រាប់តែមិនអាច Login ចូលបានមូលហេតុគេថាខ្ញុំវាយលេខសំងាតខុស ហេសហេ ចូលប្រើ Facebook រាល់ងៃ ភ្លេចលេខសំងាត បើតាមខ្ញុំសន្និដ្ឋានប្រាកដជាមានគេលួចលេខសំងាត់ Facebook របស់ខ្ញុំ 100% ។ វាមិនដែរចូលប្រើរាល់ងៃបែរជាវៃលេខសំងាត់ជិត ២០ ទៅ៣០ ដង់ខុសនោះរ៉េ។ តែនៅមានសំណាងដែរដោយខ្ញុំអោយ Facebook ផ្ញើរលេចសំងាត់ចូលគណនី Email របស់ខ្ញុំវិញ រួចដូរលេខសំងាត់ថ្មីចោល កុំអីមុខស្វាស៊ីប្រេងកូឡា។ រឿងអ្នកដែរត្រូវគេលួច ឬ Hack នៅ Facebook គឺមានច្រើនណាស់ ទើបតែពេលនេះទេដែរធ្លាក់លើខ្លួនខ្ញុំដែរសោះ។

     បើនៅស្រុកគេវិញ Hacker គឺមានទោសធ្ងន់ណាស់។តែនៅស្រុកខ្មែរដូចជាពុំអាចវែកមុខ Hacker បាននៅឡើយទេ មិនងាយទេ ""ដូចរកម្ជុលក្នុងបាតសមុទ្រអញ្ចឹង"" ព្រោះរដ្ឋាភិបាលដែរដឹកនាំដោយលោក ហ៊ុនសែន សព្វថ្ងៃ មិនដែរឈឺក្បាលនឹងរឿងនេះទេ គាត់ឈឺក្បាលតែរឿងខ្ចីលុយបរទេសអោយបានច្រើនទៅៗ រួចស្រែកប្រាប់ពិភពលកថា កម្ពុជាមានកំណើនសេដ្ឋកិច្ចកើនឡើងៗរៀងរាល់ឆ្នាំ។
     ជាចុងក្រោយខ្ញុំសំនូមពរអោយកូនខ្មែរដែរមានវាសនាសិក្សាមុខវិជ្ជា Hacking សូមកុំដើរបំផ្លាញគ្មានរើសមុខដូចនេះទៀតអី ទៅប៉ុន្មានឆ្នាំខាងមុខទៀតនិងមាន Hacker ប្រព្រឹត្តកាន់តែខ្លាំងឡើងៗ តែសូមអោយអាណិតគ្នាដែរតូចតាចផង សួរថា Hack ហើយបានស្អី??? បានខ្យល់ឬ?? មានអីអោយ Hack ៕

របបនយោបាយនៃប្រទេសម៉ាឡេស៊ី

សន្ទុះផុសផុលនៃ គណបក្សប្រឆាំងម៉ាឡេស៊ី ក្រោមការដឹកនាំរបស់អន់វ៉ារ អ៊ីប្រាហ៊ីម(Anwar Ibrahim) នាពេលបោះឆ្នោតខែឧសភាឆ្នាំ2013

ដោយ តាន់ ហ្សង់-ហ្វ្រង់ស្វ័រ : ថ្ងៃនេះ ហ្សង់-ហ្វ្រង់ស័រ តាន់ សូមបន្តចាប់អារម្មណ៍ទៅលើភូមិសាស្ត្រនយោបាយនៃភូមិភាគអាស៊ី អាគ្នេយ៍តទៅទៀត ដោយសូមលើកឡើងអំពីរបបនយោបាយនៃប្រទេស ម៉ាឡេស៊ី។ តាំងពីឆ្នាំ1957មក ម៉ាឡេស៊ីឋិតនៅក្រោមការគ្រប់គ្រងផ្ដាច់មុខរបស់គណបក្សតែមួយដែល ឈ្នះឆ្នោតរហូត នោះគឺគណបក្សអង្គការឯកភាពជាតិម៉ាឡេ។ ប្រការនេះបានធ្វើឲ្យរដ្ឋាភិបាលបន្តបន្ទាប់គ្នារេម្ដងបន្តិចៗទៅ រក អំណាចផ្ដាច់ការ។ ក៏ប៉ុន្តែ តាំងពីឆ្នាំ2008មក អប្រជាប្រិយភាពជាលំដាប់នៃគណបក្សកាន់អំណាច និងឥទ្ធិពលខ្លាំងឡើងបន្តិចម្តងៗនៃបក្សប្រឆាំងកំពុងធ្វើឲ្យឆាក នយោបាយនៃប្រទេសអាស៊ីអាគ្នេយ៍មួយ នេះប្រែប្រួលមិនតិចទេ។

   តាំងពីបានទទួលឯករាជ្យពីអង់គ្លេសនៅឆ្នាំ1957មក ម៉ាឡេស៊ីបានបង្កើតប្រព័ន្ធ នយោបាយមួយដែលថ្នាក់ដឹកនាំជាបន្តបន្ទាប់នៃប្រទេសអះអាងថា មានមូលដ្ឋាននៅលើ Consensus។ មានន័យថា មហិច្ឆតារបស់រដ្ឋអំណាច គឺបង្រួបបង្រួមបណ្តាសហគមន៍និងជាតិសាសន៍ផ្សេងៗនៅក្នុងប្រទេស ដាក់ក្រោមដំបូលនៃចលនានយោបាយចម្រុះតែមួយគត់ នោះគឺ Barisan National ប្រែថា រណសិរ្សជាតិ។ រណសិរ្សជាតិចង់ទាក់ទាញជាពិសេសសហគមន៍សំខាន់ៗទាំងបីនៃប្រទេស ពោលគឺសហគមន៍ម៉ាឡេ60% នៃចំនួនប្រជាជនទាំងស្រុង, សហគមន៍ចិន25% និង សហគមន៍ឥណ្ឌា8%។

   នៅក្នុងចលនានយោបាយចម្រុះ Barisan Nasional ឬ រណសិរ្សជាតិនេះ គណបក្សអង្គការឯកភាពជាតិម៉ាឡេ(UMNO) មានឥទ្ធិពលខ្លាំងជាងគេ ពីព្រោះគណបក្សនេះត្រូវបានគាំទ្រដោយសហគមន៍ម៉ាឡេអ្នកកាន់សាសនា អ៊ីស្លាមដែលមានចំនួនច្រើនលើសលប់នៅក្នុង ប្រទេស។ ម្ល៉ោះហើយ គេអាចនិយាយថា តាំងពីឆ្នាំ1957មក ប្រទេសម៉ាឡេស៊ីឋិតនៅក្រោមការគ្រប់គ្រងផ្ដាច់មុខរបស់គណបក្ស អង្គការឯកភាពជាតិម៉ាឡេUMNOនេះតែម្ដង។

   តាមការពិត និងនៅលើសាច់ការជាក់ស្ដែង គ្មានឡើយការបង្រួបបង្រួមគ្នារវាងសហគមន៍នានានៅក្នុងប្រទេស ម៉ាឡេស៊ី មានតែការដើរខ្សែលើជាដរាបពីសំណាក់សហគមន៍ម៉ាឡេដែលមានចំនួនច្រើន លើសលប់ទៅលើបណ្ដាសហគមន៍នានាដទៃ។ ការរើសអើងនិងនយោបាយលើកស្ទួយតែជនជាតិម៉ាឡេបែបនេះ ថែមទាំងបានបង្កឲ្យមានការប្រយុទ្ធគ្នាជាច្រើនលើកច្រើនសា រវាងសហគមន៍ចិននិងសហគមន៍ម៉ាឡេ និងបាតុកម្មពីសំណាក់ជនជាតិចិនប្រឆាំងនឹងរដ្ឋាភិបាល នៅដើមទសវត្សរ៍ទី70ទៀតផង។

   ការមានប្រៀបផ្ដាច់មុខតែឯង អស់រយៈពេលជាងកន្លះសតវត្ស នៃគណបក្សអង្គការឯកភាពជាតិ(UMNO)នៅលើ ឆាកនយោបាយម៉ាឡេស៊ី បានធ្វើឲ្យរដ្ឋាភិបាលជាបន្តបន្ទាប់គ្នា រេខ្លួនបន្តិចម្ដងៗទៅរកអំណាចផ្ដាច់ការ។ ជាក់ស្ដែងជាងគេ គឺរដ្ឋាភិបាលរបស់ម៉ាហាធីរ(Mahathir) ដែលបានគ្រប់គ្រងប្រទេសពីឆ្នាំ1981ដល់ឆ្នាំ2003។

   នៅ ក្នុងទសវត្សរ៍ទី90 ម៉ាហាធីរបានទាំងតាំងខ្លួនជាអ្នក ការពារគោលការណ៍អាស៊ី ឬអ្វីដែលគេហៅថាអាស៊ីនិយម និយាយបែបផ្សេងម៉ាហាធីរបានចេញមុខការពារអំណាចផ្ដាច់ការភ្លឺស្វាង ដើម្បីប្រឆាំងនឹងលទ្ធិប្រជាធិបតេយ្យបែបបស្ចិមលោក។ នៅក្នុងន័យនេះ ម៉ាហាធីរបានប្រើប្រាស់កងទ័ពនិងកងនគរបាល ដើម្បីក្ដាប់និងត្រួតត្រាប្រជារាស្ត្រ ដើម្បីពង្រឹងអំណាចរបស់ខ្លួន និងដើម្បីវាយបង្ក្រាបពួកប្រឆាំង។ ឧទាហរណ៍ជាក់ស្ដែង គឺការវាយបង្ក្រាបទៅលើបាតុកម្មនៅ ឆ្នាំ1986របស់ពួកមេធាវី ដែលបានទាមទារឲ្យមានការគោរពសិទ្ធិមនុស្ស។ ឧទាហរណ៍ជាក់ស្ដែងមួយទៀត គឺការចាប់ខ្លួនអន់វ៉ារ អ៊ីប្រាហ៊ីម(Anwar Ibrahim)ដាក់គុកនៅឆ្នាំ1998 អន់វ៉ារ អ៊ីប្រាហ៊ីម ដែលជាបុរសខ្លាំងទី2 ជាឧបនាយករដ្ឋមន្ត្រី និងដែលតាមការគ្រោងទៅនឹងត្រូវឡើងស្នងតំណែងនាយករដ្ឋមន្ត្រីពី ម៉ាហាធីរទៀតផង។

   ពិតមែនតែជាអ្នកកាន់អំណាចផ្ដាច់ការ ម៉ាហាធីរបានកាត់បន្ថយមិនតិចទេភាពក្រីក្រ បានលើកកម្ពស់ជីវភាពរបស់ប្រជាជនដោយសារតែការលក់ទំនិញចេញទៅក្រៅ ប្រទេស និងដោយសារតែឧស្សាហកម្មខ្លាំងក្លា ដែលបានធ្វើឲ្យកំណើនសេដ្ឋកិច្ចនៃប្រទេសម៉ាឡេស៊ី ឡើងទៅដល់6%ជាមធ្យមភាគ តាំងពីទសវត្សរ៍ទី80 រហូតដល់ឆ្នាំ2008។ ហើយនៅឆ្នាំ2012កន្លងទៅនេះ កំណើនសេដ្ឋកិច្ចរបស់ម៉ាឡេស៊ីបានកើនទៅដល់5,6% ទោះបីជាពិភពលោកត្រូវប្រឈមមុខនឹងវិបត្តិសកលក៏ដោយ។

   មុន នឹងចាកចេញពីអំណាចនៅខែតុលាឆ្នាំ២០០៣ ម៉ាហាធីរបានជំរុញអាប់ឌូឡា អាម៉ាដ បាដាវី (Abdullah Ahmad Badawi) ឲ្យក្លាយជាអ្នកដឹកនាំនៃបក្សអង្គការឯកភាពជាតិម៉ាឡេUNMO ដែលជាឈ្នាន់ជាន់ឡើងទៅធ្វើជានាយករដ្ឋមន្ត្រី។ មួយឆ្នាំក្រោយមក គឺនៅថ្ងៃទី២១មីនាឆ្នាំ២០០៤ ការបោះឆ្នោតបានអនុញ្ញាតឲ្យបាដាវីបន្តជាផ្លូវការ តំណែងជានាយករដ្ឋមន្ត្រីនៃប្រទេសម៉ាឡេស៊ី។

ក៏ប៉ុន្តែ តាំងពីឆ្នាំ2007មក លក្ខណៈផ្ដាច់ការនៃរបបនយោបាយម៉ាឡេ បាននិងកំពុងបន្តស្បើយទៅវិញបន្តិចម្តងៗ គឺហាក់បីដូចជាប្រទេសអាស៊ីអាគ្នេយ៍មួយនេះផ្ដើមឈានជើងចេញពី ប្រព័ន្ធអំណាចគណបក្សតែមួយ ទៅរកប្រព័ន្ធនយោបាយពហុបក្ស។

   មាន មូលហេតុច្រើនយ៉ាង ដែលអាចពន្យល់ការផ្លាស់ប្ដូរស៊ីជម្រៅបែបនេះ។ ម្យ៉ាង គឺការដោះលែងអន់វ៉ារ អ៊ីប្រាហ៊ីម ឲ្យចេញពីពន្ធនាគារ នៅខែកញ្ញាឆ្នាំ2004 ការដោះលែងដែលបានបើកលទ្ធភាពឲ្យអតីតឧបនាយករដ្ឋមន្ត្រីរូបនេះ ចាប់ផ្ដើមចេញមុខធ្វើជាមេដឹកនាំនៃគណបក្សប្រឆាំង។ ម្យ៉ាងទៀត គឺអសមត្ថភាពរបស់បាដាវី ក្នុងការដឹកនាំគណបក្សអង្គការឯកភាពជាតិម៉ាឡេ និងក្នុងការដឹកនាំរដ្ឋាភិបាល។ អ៊ីចឹងហើយ បានជានៅខែវិច្ឆិកាឆ្នាំ2007 បណ្ដាជនជាង3សែននាក់បានចុះធ្វើបាតុកម្ម នៅតាមដងផ្លូវនៃទីក្រុងKuala Lumpour។ គឺជាចលនាបាតុកម្មធំជាងគេមួយមិនដែលមានឡើយ នៅប្រទេសម៉ាឡេស៊ី នារយៈពេលជិត20ឆ្នាំចុងក្រោយនេះ។ នៅខែឧសភាឆ្នាំ2008 មានមហាបាតុកម្មមួយទៀតកើតឡើង នៅក្នុងរដ្ឋធានី។ បណ្ដាបាតុករប្រឆាំងនឹងប្រេងសាំងឡើងថ្លៃ ប្រឆាំងនឹងអសមត្ថភាពរបស់រដ្ឋាភិបាល ក្នុងការប្រយុទ្ធទប់ទល់នឹងអំពើពុករលួយ និងក្នុងការធ្វើកំណែទម្រង់ប្រព័ន្ធបោះឆ្នោត។ គឺនៅក្នុងបរិបទបែបនេះហើយ ដែលបក្សជំទាស់បានរួបរួមគ្នាជាធ្លុងមួយ ដើម្បីតទល់នឹងគណបក្សអង្គការឯកភាពជាតិម៉ាឡេUNMO នៅពេលបោះឆ្នោតខែមីនាឆ្នាំ2008 ការបោះឆ្នោតដែលបានធ្វើឲ្យអាសនៈ នៅក្នុងរដ្ឋសភារបស់បក្សប្រឆាំងកើនចំនួនពី18 ទៅ82។

   ការបោះឆ្នោតខែមីនាឆ្នាំ2008នៅម៉ាឡេស៊ី គឺជារលកយក្សស៊ូណាមីនយោបាយមួយ សម្រាប់គណបក្សអង្គការឯកភាពជាតិម៉ាឡេ ពីព្រោះជាលើកទីមួយបង្អស់គណបក្សមួយនេះដែលកាន់អំណាចផ្ដាច់មុខតែ ឯងនៅក្នុងប្រទេសតាំងពីឆ្នាំ1957មក ទទួលមិនបានអាសនៈចំនួន២ភាគ៣នៅក្នុងរដ្ឋសភានិងអស់មានអំណាចកែប្រែ រដ្ឋធម្មនុញ្ញបាន ស្រេចតែអំពើចិត្តទៀតហើយ។

   គឺការ ផ្លាស់ប្ដូរស៊ីជម្រៅនៅលើឆាកនយោបាយម៉ាឡេស៊ីបែបនេះហើយ ដែលបានជំរុញឲ្យលោកបាដាវីលះបង់ចោលតំណែងប្រធានបក្សអង្គការឯកភាព ជាតិម៉ាឡេនៅខែមីនាឆ្នាំ2008។ នៅថ្ងៃទី26មីនាឆ្នាំ2008 បណ្ដាប្រតិភូទាំង2 500នាក់របស់បក្សក៏បានបោះឆ្នោតតែងតាំងណាហ្ស៊ីប ទុន រ៉ាហ្សាក(Najib Tun Razak)ជាប្រធាន។ ហើយនៅថ្ងៃទី3មេសាឆ្នាំ2008ដដែលនោះ ណាហ្ស៊ីប ទុន រ៉ាហ្សាក បានក្លាយជាស្វ័យប្រវត្តិ ទៅជានាយករដ្ឋមន្ត្រីនៃប្រទេសម៉ាឡេស៊ី។ តាំងពីពេលនោះមក ណាហ្ស៊ីប ទុន រ៉ាហ្សាក ត្រូវប្រឈមមុខនឹងមេដឹកនាំគណបក្សប្រឆាំងអន់វ៉ារ អ៊ីប្រាហ៊ីម។

   ការ ប្រឈមមុខដាក់គ្នាខ្លាំងរវាងណាហ្ស៊ីប ទុន រ៉ាហ្សាកនិងអន់វ៉ារ អ៊ីប្រាហ៊ីម រវាងគណបក្សកាន់អំណាចនិងគណបក្សប្រឆាំងបានប្រព្រឹត្តទៅ នាពេលបោះឆ្នោតខែឧសភាឆ្នាំ2013។ ទោះបីជានៅទីបំផុតជ័យជំនះបានទៅបក្សកាន់អំណាចដូចពេលបោះឆ្នោត មុនៗក៏ដោយ តែលទ្ធផលនៃសំឡេងឆ្នោតបានបង្ហាញនូវការប្រែប្រួលស៊ីជម្រៅនៃ ទិដ្ឋភាពនយោបាយម៉ាឡេស៊ី និងការផ្លាស់ប្ដូរស៊ីជម្រៅនៃចិត្តគំនិតរបស់ប្រជាពលរដ្ឋម៉ាឡេស៊ី។ ពីអំណើះតទៅ សង្គមម៉ាឡេស៊ីត្រូវបានពុះចែកជាពីរសឹងស្មើគ្នា៖ នៅម្ខាងអ្នកគាំទ្របក្សប្រឆាំង និងនៅម្ខាងទៀតអ្នកគាំទ្របក្សកាន់អំណាច។ មិនមែនមាននៅម្ខាងជនជាតិម៉ាឡេ និងនៅម្ខាងទៀតអ្នកមានដើមកំណើតជាជាតិសាសន៍ចិន ឥណ្ឌា ឬជាជាតិសាសន៍ដទៃផ្សេង ដូចពេលមុនៗទៀតហើយ។ ពីអំណើះតទៅនៅម៉ាឡេស៊ី អ្នកបោះឆ្នោតឱ្យគណបក្សប្រឆាំងជាយុវជន ជាអ្នករស់នៅទីក្រុង រីឯអ្នកគាំទ្របក្សកាន់អំណាច ជាមនុស្សចាស់ ជាអ្នករស់នៅជនបទ។ ពួកយុវជនទាំងនេះដែលក្នុងខណៈនេះតំណាង1ភាគ5នៃអ្នកមានសិទ្ធិ បោះឆ្នោត និងដែលជាអ្នកនិយមលេងFacebook អាចនឹងធ្វើឱ្យក្រឡាប់ចាក់ឆាកនយោបាយម៉ាឡេស៊ី នាពេលឆាប់ៗខាងមុខ ដោយនឹងអាចបណ្ដាលឱ្យគណបក្សកាន់អំណាចតាំងពីឆ្នាំ1957មកម្ល៉េះ ចាញ់ឆ្នោត៕

5 បែបក្នុងការផ្សព្វផ្សាយប្លករបស់អ្នកដោយមិនពឹងផ្អែកបណ្ដាញសង្គម Facebook

ភាគច្រើននៃប្លកករ (blogger) តែងផ្សព្វផ្សាយប្លករបស់ពួកគេ តាមរយៈបណ្ដាញសង្គម, វេទិកា ដូចជា Facebook អីជាដើម ដើម្បីឲ្យប្លក (កំណត់ហេតុបណ្ដាញ) របស់អ្នកមានគេចូលមើលច្រើន និងឆាប់ល្បីល្បាញទៅតាមភាពសកម្មរបស់គេនិមួយៗ។ ឥឡូវនេះ ខ្ញុំសូមចែករំលែកពីវិធីផ្សព្វផ្សាយប្លកដោយមិនពឹងលើ facebook (បណ្ដាញសង្គម) តែម៉្យាងនោះទេ។ ការផ្សព្វផ្សាយនេះមានប្រយោជន៍ដល់អ្នកដែល មិនសូវចូលប្រើបណ្ដាញសង្គម ឲ្យពួកគាត់អាចដឹងពីអាសយដ្ឋានប្លករបស់អ្នក បានយ៉ាងងាយ ដោយអស់ប្រាក់ (លុយ) តិចតួច ឬមិនអស់ក៏បាន។ តែខ្ញុំមិនធានាថាអ្នកនឹងទទួលបានចំណូលទស្សនាប្លកក្នុងមួយថ្ងៃៗ កើនឡើងដោយសារតែវិធីដែលនឹងរៀបរាប់ខាងក្រោមនេះទេ តែយ៉ាងហោចណាស់ ក៏វាអាចជួយយើងបានខ្លះៗដែល បើសិនប្រធានបទដែលយើងផ្សព្វផ្សាយត្រូវចិត្តគេភាគច្រើននោះ។ តើវិធីសាស្ត្រចម្លែកទាំងនោះមានអ្វីខ្លះ?

៙ ប្លក (កំណត់ហេតុបណ្ដាញ) + ការផ្សព្វផ្សាយ ៚

1. ខិត្តប័ណ្ណបិតតាមផ្លូវ

នេះគឺជាមធ្យោបាយដ៏មានប្រសិទ្ធិភាពសម្រាប់ការលើកកម្ពស់ប្លក (កំណត់ហេតុបណ្ដាញ) របស់លោកអ្នក។ តើធ្វើដូចម្ដេច? ជាដំបូងត្រូវរចនាបង្កើតខិត្តប័ណ្ណមួយ ឬច្រើនប្រភេទ ទៅតាមទំហំ ដែលអ្នកគិតថា សមរម្យ តែកុំតូចពេក។ អ្វីដែលសំខាន់ក្នុងប័ណ្ណនោះគឺត្រូវតែមានដាក់តំណអាសយដ្ឋាន (URL) របស់ប្លកលោកអ្នក ត្រូវមាន ចំណងជើង ឃ្លាប្រយោគដែលទាក់ទាញ បើមានរូបត្រូវយករូបណាដែលអ្នកគិតថាមានគេចង់មើល ដូចជារូបតារាម៉ូដែលបរទេសអីហ្នុង ^_^។ ដែលទាក់ទាញប្លក (កំណត់ហេតុបណ្ដាញ)។ ត្រូវបិទនៅកន្លែងណាដែលមានមនុស្សចេញចូលច្រើន ដែលអនុញ្ញាត និងមិនអនុញ្ញាតក៏បាន ដូចជារបងសាលារៀន។ មនុស្សម្នាច្បាស់ជានឹងឃើញ ហើយបើពួកគាត់មានទូរស័ព្ទអ៊ីនធឺណិតរឹតតែចង់ចូលមើលភ្លាមៗក៏ថា បាន។ ប្រសិនបើអ្នកបានផ្ដល់ចំណងជើងនិងសេចក្ដីពិពណ៌នាដ៏មានប្រសិទ្ធិ ភាព នៅលើផ្ទាំងក្រដាសផ្សព្វផ្សាយ របស់អ្នកដោយមិនធ្វើឲ្យគាត់សង្ស័យ នោះពួកគេនឹងក្លាយជាភ្ញៀវរបស់មាតិកាប្លករបស់អ្នក។

2. បង្គន់សាធារណៈ

បាទ! បង្គន់សាធារណៈក៏ជាមធ្យោបាយមួយផ្សេងទៀតផងដែរ ជាកន្លែងល្អសម្រាប់ការរកចំណូលចូលទស្សនាប្លករបស់អ្នក។ នៅក្នុងប្រទេសផ្សេងៗលើពិភពលោកភាគច្រើន គេតែងតែមានឃើញអក្សរសរសេរនៅតាមរបង ជញ្ជាំងជាស្ទីលអ្វីផ្សេងៗ (Hip Hop) ទីនោះ ចុះទម្រាំងនៅក្នុងបន្ទប់បង្គន់សាធារណៈ ដែលគ្មានអ្នកណាដឹងថាអ្នកសរសេរនោះជាអ្នកណា! ដែលបង្គន់សាធារណៈត្រូវបានគេសរសេររឿងផ្សេងគ្នា ដូចជាលេខទូរស័ព្ទ ឈ្មោះ នៅលើជញ្ជាំងបង្គន់។ ដូច្នេះអ្នកក៏អាចធ្វើឱ្យមានប្រយោជន៍ដល់ប្លករបស់អ្នកបានដែល។ ទុក URL ប្លករបស់អ្នកនៅលើជញ្ជាំងបង្គន់។ អ្នកខ្លះគេចង់ដឹង ចង់ឃើញ គេក៏ចូលទៅកាន់ URL ប្លកអ្នក ដើម្បីដឹងបន្ថែមទៀតពីប្លកយើងថាមានអីខ្លះដែលគេចង់មើល។

3. ការផ្សព្វផ្សាយផ្ទាល់មាត់

មួយនេះជាវិធីដ៏ល្អសម្រាប់ការលើកកម្ពស់កំណត់ហេតុបណ្ដាញរបស់ អ្នក។ ប្រាប់ អ្វីដែលល្អអំពីប្លករបស់អ្នកទៅមិត្តភក្តិរបស់អ្នក និងលួងលោម លើកទឹកចិត្តដល់ពួកគេឱ្យមកទស្សនាប្លករបស់អ្នកផងដែរ។ បើអ្នកហ៊ានសាកល្បងវិធីសាស្ត្រនេះទៅមនុស្សចម្លែក (ពួកគេអាចគិតថាអ្នកបានក្លាយទៅជាមនុស្សឆ្កួត, បែបអ្នកគិតថាគ្មានអ្វីត្រូវចែករំលែកទៅកាន់មនុស្សមិន ស្គាល់គ្នានោះទេ ប៉ុន្តែអ្នកត្រូវគិតថា នោះជាគឺអ្វីដែលមិនមែនជារឿងធំនាំឲ្យគេថាអ្នកឆ្កួតនោះទេ ព្រោះអ្វីដែលអ្នកចង់បង្ហាញគេគឺមានប្រយោជន៍ បើថាឆ្កួតគឺឆ្កួតនឹងការសរសេរប្លកចែករំលែកចំណេះដឹង មិនមែនឆ្កួតនឹងរឿងគ្មានបានការនោះទេ) ។ ដើម្បីអស់មន្ទិល ពួកគេច្បាស់ណាស់ថា នឹងចូលមើលប្លក (កំណត់ហេតុបណ្ដាញ) របស់អ្នក។

4. ការប្រើប្រាស់ហាងអ៊ីនធឺណិត

ចូលទៅហាងអ៊ីនធឺណិតផ្សេងៗគ្នា រួចព្យាយាមដូរការកំណត់ក្នុងកម្មវិធីបើកអ៊ីនធឺណិតផ្សេងៗដូចជា Firefox, Chrome Opera ជាដើម ឲ្យបើកប្លករបស់លោកអ្នកដោយស្វ័យប្រវត្តនៅពេលបើកកម្មវិធី browser ទាំងនោះ។ បើអាចដូរបានច្រើនកុំព្យូទ័ររឹតតែប្រសើរ តែកុំឲ្យម្ចាស់ហាងសង្ស័យថាអ្នកធ្វើអ្វីប្លែកៗ ដែលនាំឲ្យគេយល់ច្រឡំ។ នេះជាវិធីល្អមួយដែលបើយើងមានប្លក យើងគួរតែធ្វើបែបនេះដើម្បីឲ្យគេបានដឹងដោយមិនស្ទាក់ស្ទើរ។ នៅពេលដែលពួកគេបានបើកកម្មវិធីរុករកដោយស្វ័យប្រវត្តិ ពួកគេនឹងចូលទៅកាន់គេហទំព័រកំណត់ហេតុបណ្ដាញរបស់អ្នកភ្លាម។ ប្រសិនបើពួកគេចាប់អារម្មណ៍នោះ ប្រហែលជាគេអាចកត់ទុកមើលនៅពេលក្រោយក៏អាចថាបានដែរ។

5. ផ្សាយពាណិជ្ជកម្មក្នុងកាសែត (សារព័ត៌មាន)

ប្រសិនបើអ្នកហ៊ានចំណាយប្រាក់កាក់មួយចំនួន សម្រាប់ការផ្សព្វផ្សាយប្លករបស់អ្នក ការជ្រើសរើសការផ្សាយតាមទំព័រកាសែតអាចជាវិធីល្អ ដែលអាចឲ្យអ្នកទស្សនាប្លកអ្នក តែនេះជាវិធីមិនងាយមានអ្នកធ្វើព្រោះថា ប្លកបង្កើតឡើងមិនសូវអាចរកលុយដូចគេហទំព័រដែលគេមានគ្នាច្រើន មានអ្នកសរសេរដែលមានជំនាញ បើជាប្លកខ្មែរទៀតរឹតតែមិនងាយមានលុយថែមទៀត។ តែបើហ៊ានចុះផ្សាយតាមកាសែត គួរជ្រើសការសែតដែលមានអ្នកអានច្រើន។ គួរផ្សាយអ្វីដែលធ្វើឱ្យមានការចាប់អារម្មណ៍ដូចជា "ទាញយកគ្រប់ប្រភេទ ទាញយកសៀវភៅខ្មែរល្អៗ" ហើយកុំ ភ្លេចដាក់ URL របស់ប្លក។ បើតាមខ្ញុំដឹងកាសែត "ភ្នំពេញប៉ុស្តិ៍" គេមានឲ្យយើងផ្សាយដំណឹងខ្លីៗដោយមិនគិតលុយដែរ ដែលអាចអ្នកគួរសាកល្បងបាន។

ទាំងនេះគឺជាវិធីផ្សព្វផ្សាយមួយចំនួនដែលមិនពឹងផ្អែកលើបណ្ដាញ សង្គម ក្នុងការលើកកម្ពស់ ប្លក (កំណត់ហេតុបណ្ដាញ) របស់អ្នក ដើម្បីបង្កើនចំណូលអ្នកទស្សនាប្លករបស់អ្នក។ តែទោះជាយ៉ាងណាក៏យើងមិនអាចមើលរំលងបណ្ដាញសង្គម Facebook បានឡើយ ព្រោះវាជាទីបណ្ដុំមនុស្ស។ ប្រសិនបើលោកអ្នកមានវិធីផ្សេងៗទៀត ដែលជាផ្លូវផ្សព្វផ្សាយប្លកបាននោះ សូមចូលរួមចែករំលែក ដោយបញ្ចេញមតិខាងក្រោមនេះ រាល់មតិរបស់លោកអ្នកមានតម្លៃខ្លាំងណាស់ ក្នុងការជំរុញទឹកចិត្តអ្នកសរសេរប្លកខ្មែរយើង ឲ្យពួកគាត់មានកម្លាំងបន្តការចែករំលែកដើម្បីខ្មែរទាំងអស់គ្នា៕

*បកប្រែនិងថែមរបោយពី : Blogger Trix

11 ចំណុចដែល Google អាចបិទប្លក់របស់អ្នកឈប់ឲ្យប្រើប្រាស់

Blogger របស់ Google គឺជាសេវាឥតគិតថ្លៃ ដែលបានរចនាឡើង សម្រាប់ការទំនាក់ទំនង ដោយខ្លួនឯង សេរីភាពខាងការបញ្ចេញមតិ និងសេរីភាពនៃការ បញ្ចេញមតិយោបល់នានា។ ទន្ទឹមនឹងនេះ Blogger ក៏មានប្រព័ន្ធសុវត្ថិភាពមួយចំនួនដែរ បើសិនជាអ្នកបំពានទៅនឹងលក្ខខណ្ឌទាំងអស់នោះ គេនឹងអាចបិទ Blogger របស់អ្នកលែងឱ្យប្រើប្រាស់។ បើ Blogger ជា ការរំលោភ គោលការណ៍ណែនាំ ដែលមានគុណភាព របស់ Google បន្ទាប់មក Google នឹងចាត់វិធានការ ប្រឆាំងនឹង ថាការ កំណត់ហេតុបណ្ដាញ blogger របស់អ្នក ដើម្បីការពារអ្នកប្រើប្រាស់របស់ខ្លួន។

សម្រាប់ខ្ញុំ Blogger មានលក្ខណៈពិសេសជាង Wordpress ព្រោះថាមិនងាយបិទយើងចោលដូច Wordpress ទេ។ មុននឹងបិទយើងចោលគឺគេដឹងពីមូលហេតុច្បាស់លាស់ មិនមែនគ្រាន់តែគេរាយការណ៍បន្តិចបន្តួចនោះទេ ទើបពេលនេះអាសត្វចម្លែកខ្ញុំ ជ្រើសរើសសេវាបង្ហោះ Blogger។ សូមអាននូវលក្ខខណ្ឌខាងក្រោម ដើម្បីជាការ ការពារ Blogger របស់លោកអ្នក ពីការបិទចោល លេងឲ្យប្រើប្រាស់ ៖

1. ការសរសេរអត្ថបទ ៖

Blogger អាចនឹងបិទគណនីរបស់លោកអ្នក ប្រសិនបើលោកអ្នកបំពានដោយ ដាក់ប្រកាសណាមួយថាមិនសមហេតុផល មានន័យថា មាតិកាដែល ជំរុញអោយមាន អំពើហិង្សា ឆ្ពោះទៅរកការ ស្អប់ ពូជសាសន៍ ជនជាតិ សាសនា ពិការភាព ភេទ អាយុ ស្ថានភាព មនុស្សចាស់ ឬអត្តសញ្ញាណ ការតម្រង់ទិសទៅរកខាងផ្លូវភេទ។ ខ្ញុំសូមឧទាហរណ៍អំពីការប្រឆាំងគ្នារវាងសាសនា ៖ ពួកសាសនា A មួយ ប្រឹងប្រែងសរសេរប្រកាសប្រឆាំងនឹងពួកសាសនា B ។

2. មាតិកាឆៅ :

នៅក្នុងផ្នែកនេះប្រហែលជាលោកអ្នកឆ្ងល់ហើយ ថាមាតិកាឆៅយ៉ាងម៉េច? មាតិកាឆៅគឺជាការដែលអ្នកគ្រាន់តែថតឈុតឆាកណាមួយ ដូចជាការវាយតប់ ជម្លោះទាស់ទែង ចោរប្លន់ ហើយដាក់ប្រកាសផ្សាយ ដោយគ្មានអត្ថាធិប្បាយពណ៌នាអំពីព្រឹត្តិការណ៍នោះ (គឺគ្មានការបកស្រាយប្រធាន) ឱ្យបានក្បោះក្បាយនោះទេ។

3. អំពើហិង្សា :

លោកអ្នកមិនត្រូវប្រកាសគំរាមកំហែងដល់ជនដទៃណាម្នាក់ ឬគាំទ្រអំពើរបស់របស់ជនដទៃណាមួយទេ។ ឧទាហរណ៍ ៖ លោកអ្នកលើកទឹកចិត្តដល់អ្នកប្រព្រឹត្តអំពើហិង្សាណាមួយ ហើយជំរុញឲ្យទឹកចិត្តគេកាន់តែ ចង់ទៅប្រព្រឹត្តអំពើល្មើសច្បាប់នោះទៀត។

4. សុវត្ថិភាពកុមារ :

ក្រុមហ៊ុន Google នឹងបិទប្លក់របស់លោកអ្នកប្រសិនបើលោកអ្នកមានការប្រកាសរំខានដល់កុមារ ៖
- កាមសាស្ត្រកុមារ : Google នឹង បញ្ចប់ដំណើរការក្នុង គណនី របស់អ្នកប្រើ ដែលបានប្រកាសផ្សាយអំពីការរួមរ័កកុមារណាមួយ។ ហើយក្រុមហ៊ុន Google ផងដែរនឹងរាយការណ៍ ទៅអាជ្ញាធរមានសមត្ថកិច្ច អំពីអំពើល្មើសច្បាប់របស់អ្នក។
- នាំទៅរកផ្លូវរួមភេទ : លោកអ្នកមិនត្រូវប្រកាសផ្សាយ ជាអត្ថបទ ឬការប្រកាសជារូបភាពដែលនាំកុមារទៅរកផ្លូវ ឬចំណង់រួមភេទ។

5. ការរំលោភបំពានទៅលើមាតិការបស់អ្នកដទៃដោយគ្មានការអនុញ្ញាត :

មានប្លក់មួយចំនួនធំដែលបាន ចម្លង (Copy) អត្ថបទប្រកាសរបស់អ្នកដទៃ ប៉ុន្តែអ្នកកុំច្រឡំ នោះជារឿងមួយល្អ ឬជារឿងមួយដែលគ្មានបញ្ហាទេ។ ប៉ុន្តែផ្ទុយមកវិញ បើសិនជាអ្នកចម្លងប៉ះចំ ប្លក់ ឬគេហទំព័ររបស់នរណាម្នាក់ដែលគេកំណាញ់អាចម៍ក្ដាប់ ហាមមិនឱ្យចម្លងនោះ គេនឹងរាយការណ៍ទៅកាន់ក្រុមហ៊ុន Google ពេលនោះក្រុមហ៊ុន Google នឹងពិនិត្យ ហើយបើឃើញដូចនោះមែនអ្នកច្បាស់ជានឹងស៊យហើយ ដូចឈរកណ្ដាលទន្លេឲ្យក្រពើអញ្ចឹង។

6. ប្រកាសផ្សាយព័ត៌មានសម្ងាត់របស់នរណាម្នាក់ :

អ្នកដឹងហើយថា អាថ៌កំបាំងរបស់មនុស្សផ្សេងគឺមិនមែនយើងជួយលាក់នូវអាថ៌កំបាំង អាក្រក់នោះទេ មានន័យថា អ្នកមិនត្រូវផ្សព្វផ្សាយរឿងផ្ទាល់ខ្លួនរបស់នរណាម្នាក់ ដូចជា ៖ លេខទូរស័ព្ទ លេខប័ណ្ណឥណទាន ឬបណ្ដាញទំនាក់ទំនងណាមួយនោះ។

7. ការលាក់អត្តសញ្ញាណពិត ហើយប្រកាសតិះដៀលដល់នរណាម្នាក់ :

អ្នកពុំគប្បីនឹងប្រកាសដោយធ្វើការតិះដៀលដល់ជនណាមួយ ហើយលាក់អត្តសញ្ញាណពិតរបស់ខ្លួននោះទេ ឬអ្នកប្រាប់អត្តសញ្ញាណក្លែងក្លាយដោយដាក់អត្តសញ្ញាណអ្នកផ្សេង។

8. សកម្មភាពខុសច្បាប់ :

ចូរកុំប្រើ blogger ដើម្បីចូលរួមក្នុងសកម្មភាពខុសច្បាប់ ឬដើម្បីលើកកម្ពស់ សកម្មភាពមានគ្រោះថ្នាក់និង ខុសច្បាប់។ ឧទាហរណ៍ ៖ អ្នកនិពន្ធអត្ថបទនានាដែលជំរុញប្រជាជនឲ្យផឹកស្រា លេងស្រី ជាដើម ដែលនាំអាប់ឱនកិត្តិសព្ទជាតិ។

9. ឈ្មោះប្លក់ ដែលមិនអាច :

ឈ្មោះប្លក់របស់អ្នកពុំគប្បីដាក់ (xxxxxxx.blogspot.com) ទេ ព្រោះអាស័យដ្ឋាននេះពុំមានការអនុញ្ញាត ពោលគឺវាប្រឈមមុខទៅនឹងការបិទខ្លាំងណាស់។

10. មេរោគ :

Blogger ត្រូវបានហាមឃាត់យ៉ាងតឹងរឹងចំពោះអ្នក ក្នុងការដែលអ្នកព្យាយាមដំឡើងកម្មវិធី ឬបញ្ជូនមេរោគផ្សេងៗទៅក្នុងប្លក់។ ពិសេសអ្នកដែលបង្កប់កូដព្យាបាទ ដល់អ្នកប្រើប្រាស់ប្លក់អ្នក។

11. បើគេក្រុមហ៊ុនបិទយើងហើយ :

ខ្ញុំសូមផ្ដល់យោបល់ទៅលោកអ្នក បើសិនជាលោកអ្នកត្រូវបានទទួលសារ ថាប្លក់របស់លោកអ្នកនឹងត្រូវបិទហើយ លោកអ្នកពុំគប្បី ទុកការប្រកាសរបស់អ្នកបន្តទៀតទេ អ្នកគប្បីត្រូវលុបវាចោលទើបជាការប្រសើរ ព្រោះក្រែងមានបញ្ហាទៅថ្ងៃក្រោយ ព្រោះវាលែងមានសុវត្ថិភាពហើយ។ :D

សង្ឃឹមថាហេតុផលទាំងអស់ខាងលើអ្នកទាំងអស់គ្នាអាចទទួលយកបាន ដើម្បីចៀសវាងការបិទប្លក់អ្នកចោលដោយគ្មានមូលហេតុច្បាស់លាស់ បើដឹងហើយគួរចៀសវាងទើបប្រសើរ។

គោលការណ៍ 10 យ៉ាងនាំឲ្យចងចាំមេរៀនបានល្អ

1. ត្រូវ មានទឹកចិត្តស្រឡាញ់ចំណេះដឹង លុះត្រាណាតែពេញចិត្តនឹងការរៀន ទើបរៀនទៅចងចាំមេរៀនបានល្អ បើមិនមានចិត្តរៀនហើយពិបាកចងចាំណាស់។

2. ជ្រើសរើសយកគោលសំខាន់នៃមេរៀនយកមករៀន រួចស្វែងយល់លម្អិតលើចំនុចធំៗនីមួយៗ។ ចំនុចគោលធំៗប្រៀបដូចជាមេដែក ចំណែកឯចំនុចលំអិតប្រៀបបានដូចជាកំទេចដែក កាលណាយើងចាប់បានមេដែកហើយ នោះយើងអាចស្រូបទាញយកកំទេចដែកបានដោយងាយ។ វិធីនេះជួយមិនឲ្យខួរក្បាលនឿយហត់ខ្លាំងពេក ពោលគឺចាប់យកតែចំនុចធំៗមកពិចារណា។

3. រៀនដើម្បីចេះ មិនមែនរៀនតែពេលប្រឡងទេ ដូច្នេះជានិច្ចកាលចូរខិតខំរៀន និងចងចាំខ្លឹមសារមេរៀន។

4. ចេះចំណេះដឹងមូលដ្ឋានកាន់តែច្រើនកាន់តែល្អ ៖ ប្រសិនបើយើងស្តាប់រឿងអ្វីមួយដែលថ្មីស្រឡាងនោះយើងពិបាកចាប់បាន អត្ថន័យទាំងស្រុងណាស់ តែបើយើងធ្លាប់ដឹង ឬមានបទពិសោធន៍វិញ នោះយើងនឹងចាប់បានខ្លឹមសារដោយងាយ។ និស្សិតភាគច្រើនតែងយល់ច្រឡំថាការរៀនមុខវិជ្ជានៅឆ្នាំមូលដ្ឋាន ក្រៅពីជំនាញរបស់ខ្លួនគឺជារឿងឥតប្រយោជន៍ តាមការពិតវាជួយឲ្យពួកគេងាយចាប់បាន ងាយសិក្សាជំនាញផ្សេងទៀត។ មុខអាជីពនាពេលអនាគត តែងចាប់ផ្តើមពីការសិក្សានៅឆ្នាំទី 1។

5. រៀបចំចំណេះដឹងឲ្យមានរបៀបរៀបរយ ប្រសិនបើអ្នកចង់ទិញរបស់ទាំងអស់ខាងក្រោមនេះ អ្នកប្រាកដជាពិបាកចងចាំទាំងអស់ណាស់ : សាច់ គោ ត្រសក់ ដូង ជី ល្ហុង សាច់ក្រក ដែកគោល ជក់ សៀវភៅ ត្រីងៀត ល្ពៅ ពូថៅ ប៊ិច ការ៉ុត…។ តែបើអ្នករៀបចំជាផ្នែកៗវិញ ពិតជាពុំសូវពិបាកចាំទេ :

បន្លែ : ត្រសក់ ល្ពៅ ដូង ជី ល្ហុង ការ៉ុត
សាច់ : សាច់គោ សាច់ក្រក ត្រីងៀត
សម្ភារ : រោងជាង : ដែកគោល ពូថៅ ជក់
សម្ភារ : សិក្សា : សៀវភៅ ប៊ិច

ចំណេះដឹងក៏មានលក្ខណៈប្រហាក់ប្រហែលគ្នានេះដែរ ប្រសិនបើមិនរៀបឲ្យមានរបៀបទេ មិនអាចចងចាំបានល្អឡើយ។

6. ទន្ទេញ : ដើម្បីឲ្យចងចាំបានយូរ គ្មានអ្វីប្រសើរជាងការទន្ទេញទេ។ ចូររៀបចំមេរៀនឲ្យមានលំដាប់លំដោយ រួចហើយទន្ទេញឲ្យចាំ។ ពេលទន្ទេញចូរអានឲ្យលឺៗ ឬសរសេរ ឬ គូសវាស ធ្វើបែបនេះជួយឲ្យងាយចងចាំបានល្អ។

7. សង្ខេប : អ្នកចិត្តវិទ្យាជឿថា ខួរក្បាលរបស់មនុស្សត្រូវការពេល 4 វិនាទី ទៅ 15 វិនាទី ដើម្បីបង្រួមព័ត៌មានដែលទទួលបាន។ ព័ត៌មានដែលអ្នកទទួលបានពីមេរៀននីមួយៗ នៅមានសភាពទូលាយនៅឡើយ ដូចនេះអ្នកគួរតែរកពេលវេលាបង្រួមសង្ខេបវាឲ្យងាយស្រួលចងចាំ។ អ្នកគួរអានមេរៀនត្រួសៗឡើងវិញពេលរៀនចប់ភ្លាមៗដើម្បីឲ្យខួរ ក្បាលងាយស្រួលចងចាំទុក។ បើទន្ទេញទៀត កាន់តែប្រសើរ។

8. បែងចែកពេលវេលាខ្លីៗសិក្សា : វិធីនេះមានប្រយោជន៍ជាងសិក្សារយៈពេលច្រើនម៉ោងដោយមិនសម្រាក ពីព្រោះ (1) រាងកាយនិងអារម្មណ៍បានសម្រាក (2) មានអារម្មណ៍ក្លៀវក្លាក្នុងការសិក្សា (3) អស់បញ្ហារឿងមុខវិជ្ជាដែលមិនចូលចិត្តរៀន ព្រោះរៀនតិចៗខ្លីៗ (4) សន្ទុះសិក្សាកើនឡើង ខួរក្បាលបើកទូលាយចំពោះរឿងអតីតកាលនិងអនាគតកាល។ ការរៀនដោយប្រើពេលខ្លីៗរួមមានដូចជា : រៀនពេលចេញលេងម្តងៗ រៀនពេលដើរមកថ្នាក់រៀន ឬរៀនពេលដើរទៅចំណតម៉ូតូ/ឡាន ដែលប្រើរយៈពេលត្រឹម 5 នាទី ឬ 10 នាទី។

9. ប្រើលំនឹកគិត ឬរូបភាពជួយដល់ការចងចាំ ដូចជាប្រើដ្យាក្រាមជាដើម ដែលធ្វើឲ្យខួរក្បាលដើរ 100%។ អ្នកវិទ្យាសាស្ត្ររកឃើញថា ខួរក្បាលមនុស្សចែកជាពីរផ្នែក ខាងឆ្វេងសម្រាប់ទទួលព័ត៌មានជាសូរសំលេង ឯខាងស្តាំសម្រាប់ទទួលព័ត៌មានជារូបភាព(ឃើញភ្នែក)។ ប្រសិនបើអ្នកទន្ទេញមេរៀនតាមតែពាក្យនោះមានន័យថាប្រើបានតែ ចំណែកម្ខាងរបស់ខួរក្បាលតែប៉ុណ្ណោះ។ តែបើអ្នកទន្ទេញដោយប្រើពាក្យគួបផ្សំជាមួយនិងរូបភាព ឬគំនូសតាង ផ្សេងៗ នោះអ្នកនឹងបានប្រើនូវថាមពលពេញលេញរបស់ខួរក្បាល។

10. យករូបភាពឬវត្ថុតាងណាមួយទុកជាការចំណាំផ្ទាល់ខ្លួន ឧទាហរណ៍យកមេរៀនចាស់ដែលយើងចាំបានល្អហើយ មកភ្ជាប់ជាមួយមេរៀនថ្មី ធ្វើដូច្នេះពេលណានឹកដល់មេរៀនចាស់ មេរៀនថ្មីក៏លេចផុសឡើង ងាយស្រួលចាំ មិនបាច់ប្រើកម្លាំងគិតច្រើន។

រៀនយ៉ាងម៉េចទើបទទួលបានចំណេះដឹងអតិបរមា?

ច្រកផ្លូវសំខាន់ដែលអាចផ្ដល់ចំណេះដឹងដល់អ្នកសិក្សារៀនសូត្ររួមមាន ៖

1. ការអាន
2. ការសរសេរ
3. ការសន្ទនា
4. ការសង្កេត

៙ ការអាន ៚

គួរជ្រើសរើស យកសៀវភៅណាដែលផ្ដល់ចំណេះដឹង។ គួរជៀសវាងសៀវភៅដែលអាចប្រែក្លាយជាថ្នាំពិស ឬសៀវភៅណាដែលអានហើយស្រង់យកប្រយោជន៍គ្មាន ខាតពេលឥតប្រយោជន៍។ ដើម្បីនឹងបានប្រយោជន៍អតិបរមាពីសៀវភៅ គេគួរប្រតិបត្តិតាមគោលការណ៍ដូចតទៅ :
- ខិតខំអានសៀវភៅមួយក្បាល ឲ្យយល់សេចក្ដីជាក់ច្បាស់ ចាំខ្លឹមសារសំខាន់ៗ ប្រសើរជាងអានសៀវភៅដប់ក្បាល តែចាប់យកគោលសំខាន់មិនបាន។
- ទោះបី អានសៀវភៅក្ដី ស្ដាប់សន្ទរកថាក្ដី ចូរកុំស្ដាប់ឬអានត្រឹមតែសេចក្ដីដែលបានឮ ឬឃើញ។ ចូរពិចារណាឲ្យចូលដល់ជម្រៅអាថ៌កំបាំងពីខាងក្រោយអត្ថបទរបស់ អ្នកនិពន្ធ។
- ពេលអានសៀវភៅត្រូវខិតខំវិនិច្ឆ័យថាអ្នកនិពន្ធមានវិធីនិពន្ធ យ៉ាងម៉េច? ចូលចិត្តនិពន្ធរឿងអ្វីច្រើនជាងគេ? ហើយគួរប្រៀបធៀបជាមួយស្នាដៃរបស់អ្នកនិពន្ធផ្សេងទៀត តើមួយណាល្អជាង?
- ប្រការសំខាន់បំផុត គឺរាល់ពេលអានចប់ ត្រូវខិតខំនឹកថាយើងទទួលបានសេចក្ដីអ្វីខ្លះ ហើយយើងបានប្រយោជន៍អ្វីខ្លះពីការអានសៀវភៅនេះ។

៙ ការសរសេរ ៚

ចំណេះដឹង ដែលទទួលបានមកហើយ ជួនកាលនៅស្រពិចស្រពិល ប៉ុន្តែលុះបានចាប់ប៊ិចសរសេរចេញមកហើយ ក៏ស្រាប់តែច្បាស់លាស់ឡើងភ្លាមមួយរំពេច។ ការសរសេរមិនត្រឹមតែជួយកត់ត្រាកុំឲ្យភ្លេចប៉ុណ្ណោះទេ ថែមទាំងជួយនាំផ្លូវឲ្យកើតគំនិតថ្មីៗទៀតផង។ សូមធ្វើតាមការណែនាំខាងក្រោមដើម្បីឲ្យខួរក្បាលកាន់តែរស់រវើក :
- ហ្វឹកហាត់សរសេរជារៀងរាល់ថ្ងៃ នោះលោកអ្នកនឹងឃើញថាគំនិតរត់មកលោកអ្នកច្រើនជាងពេលដែលលោកអ្នកគិតឬនិយាយ ជាអនេក។
- ប្រសិនបើមានគំនិតអ្វីថ្មីលេចឡើង ត្រូវសរសេរទុកភ្លាម។
- ត្រូវហាត់កត់ត្រាកិច្ចការដែលលោកអ្នកនឹងត្រូវធ្វើនៅថ្ងៃស្អែក។ ស្អែកឡើងត្រូវពិនិត្យមើល កិច្ចការទាំងនោះ តើបានធ្វើអ្វីខ្លះ មិនបានធ្វើអ្វីខ្លះ។ ប្រសិនបើលោកអ្នកធ្វើបានដូច្នេះ រាល់ថ្ងៃ ត្រឹមតែមួយខែប៉ុណ្ណោះ លោកអ្នកនឹងឃើញថាខ្លួនឯងប្រែប្រួល។

៙ ការសន្ទនា ៚

ការសន្ទនា គឺជាផ្លូវដ៏ប្រសើរមួយដែលជួយឲ្យយើងទទួលបានចំណេះ និងគំនិតជាច្រើន ទោះជាការសន្ទនានោះជាមួយមនុស្សប្រភេទណាក៏ដោយ។
- ពេលសន្ទនាជាមួយនរណាម្នាក់ យើងគួរដឹកនាំការសន្ទនាចូលដល់រឿងដែលដៃគូសន្ទនាស្ទាត់ជំនាញបំផុត។ នេះជាផ្លូវនាំឲ្យយើងទទួលបានចំណេះថ្មីៗ។
- គួរព្យាយាមស្ដាប់ឲ្យបានច្រើន និងនិយាយតិចតួចបានហើយ ព្រោះអ្នកនិយាយច្រើន ច្រើនតែគេធុញទ្រាន់។

៙ ការសង្កេត ៚

ចំណេះដែល មានប្រយោជន៍ក្រៃលែងដល់យើង បានមកពីការសង្កេត។ ការសង្កេតធ្វើឲ្យយើងទទួលបានចំណេះថ្មីៗ និងស្រូបទាញយកចំណេះដឹងបានពីគ្រប់ទីកន្លែង។
- ត្រូវខិតខំហាត់សង្កេត មើលវត្ថុផ្សេងៗដោយល្អិតល្អន់ កុំមើលត្រឹមតែសំបកក្រៅ។
- ព្យាយាមសង្កេត ដោយធ្វើហាក់ដូចជានឹងត្រូវនរណាសួរយើងអំពីវត្ថុនោះ ហើយយើងប្រុងប្រៀបនឹងឆ្លើយប្រាប់ពេញលេញគ្រប់ជ្រុងជ្រោយ។
កាលបើបានប្រតិបត្តិតាម គោលទាំង 2 ខាងលើជាប្រចាំហើយ យើងនឹងទទួលបានប្រយោជន៍ជាទីបំផុត ព្រោះពីមួយថ្ងៃទៅមួយថ្ងៃ មានរបស់ច្រើនណាស់ដែលឆ្លងកាត់ភ្នែកត្រចៀកយើង។ របស់ទាំងនោះអាចនឹងមានប្រយោជន៍ដល់យើង កាលបើមិនចេះសង្កេត ក៏ទុកដូចជាការបណ្ដោយឲ្យ "កំណប់ទ្រព្យដើររំលងទៅជារៀងរាល់ថ្ងៃ"។

(ស្រង់ចេញពីសៀវភៅ "នយោបាយអប់រំខួរក្បាល" និពន្ធដោយ ម៉ៅ សុវណ្ណា បោះពុម្ពលើទី 1 ឆ្នាំ 1971)

Pages

Wednesday, September 18, 2013

Tuesday, September 17, 2013

៙ ប្លក (កំណត់​ហេតុ​បណ្ដាញ) + ​ការ​ផ្សព្វផ្សាយ ៚

1. ខិត្តប័ណ្ណ​បិត​តាម​ផ្លូវ

2. បង្គន់​សាធារណៈ

3. ការ​ផ្សព្វផ្សាយ​ផ្ទាល់​​មាត់

4. ការ​ប្រើ​ប្រាស់​ហាង​អ៊ីនធឺណិត

5. ​ផ្សាយ​ពាណិជ្ជកម្ម​ក្នុង​​កាសែត​ (សារព័ត៌មាន)

1. ការ​សរសេរ​អត្ថបទ ៖

2. មាតិកា​ឆៅ :

3. អំពើ​ហិង្សា :

4. សុវត្ថិភាព​កុមារ :

5. ការ​រំលោភ​បំពាន​ទៅ​លើ​​មាតិកា​របស់​អ្នកដទៃ​ដោយ​គ្មាន​ការអនុញ្ញាត :

6. ប្រកាស​ផ្សាយ​ព័ត៌មាន​​សម្ងាត់​របស់​នរណា​ម្នាក់ :

7. ការ​លាក់​អត្តសញ្ញាណ​ពិត ហើយ​ប្រកាស​តិះដៀល​ដល់​នរណា​ម្នាក់ :

8. សកម្មភាព​ខុសច្បាប់ :

9. ឈ្មោះ​ប្លក់ ដែល​មិន​អាច :