បើនិយាយពីជីវិតសិក្សានៅមហាវិទ្យាល័យមនុស្សភាគច្រើនគិតថាវា ជារឿងងាយៗ ប្រសិនបើមិនមកប្រលូកខ្លួនផ្ទាល់នោះអ្នកមិនដឹងទេថាតើវាមាន ការពិបាកយ៉ាងណានោះ ទម្រាំរៀនចប់ បួនឆ្នាំ ត្រូវប្រឈមជាមួយហេតុការណ៍ជាច្រើនដែលកើតឡើងនៅក្នុងរបងមហា វិទ្យាល័យ។ វិធីនៃការប្រើជីវិតរស់នៅដើម្បីឲ្យមានសេចក្តីសុខ ជារៀងរហូតក្នុងកំឡុងពេលសិក្សានោះ វាក៏មានច្រើនបែបច្រើនយ៉ាងផ្សេងៗគ្នា តែក៏មិនជាមានអ្នកចងក្រងទុកជាឯកសារណាមួយនោះដែរ មានតែពួកយើងទាំងអស់គ្នាដែលទទួលបានលទ្ធផលសម្រេចរួចហើយ ក្នុងការប្រើជីវិតរស់នៅយ៉ាងមានសេចក្តីសុខនឹងចូលរួមចែករំលែក ដល់អ្នកទាំងអស់គ្នាមានដូចជា៖
១. សម្របខ្លួនឲ្យត្រូវនឹងសង្គម គឺត្រូវព្យាយាមបើកចិត្តឲ្យទូលាយទទួលយកនូវរឿងរ៉ាវថ្មីៗ ដែលកំពុងតែឈានជើងចូលមកក្នុងអនាគតដ៏ខ្លីខាងមុខរបស់ខ្លួន។
២. ចូលរួមការងាររួមរបស់មហាវិទ្យាល័យ គឺបើសិនជាមហាវិទ្យាល័យរៀបចំកម្មវិធីអ្វីមួយ អ្នកត្រូវចូលរួមមានដូចជាការធ្វើដំណើរទៅបោះជំរំនៅតាមបណ្តា ខេត្តនានា ការជួយការងារបរិស្ថានដូចជា សម្អាតទីប្រជុំជន ដាំដើមឈើ…ជាដើម ដើម្បីទទួលបានបទពិសោធន៍។
៣. ត្រូវចេះរាប់អានមិត្តភ័ក្ត្រ ការរាប់អានត្រឹមត្រូវគឺ អ្នកត្រូវរាប់អានមិត្តដែលនាំឲ្យអ្នកដើរលើផ្លូវល្អ អ្នកដែលសង្គមភាគច្រើនរាប់រក ចេះយល់ពីអធ្យាស្រ័យគ្នាទៅវិញទៅមក ណែនាំក្នុងផ្លូវល្អក្នុងការរៀនសូត្រ ទាំងនេះគឺជាការរាប់អានមិត្តនៅក្នុងផ្លូវល្អ។ ត្រូវជៀសវាងរាប់អានមិត្តដែលនាំឲ្យយើងវិនាសដូចជា នាំអ្នកប្រើប្រាស់ថ្នាំញៀន ផឹកស៊ីអាវ៉ាសែ ដើរលេងប៉ោឡែ ចូរកុំទៅរាប់អានអ្នកទាំងអស់នេះជាដាច់ខាត។ ខ្ញុំធ្លាប់ឃើញមិត្តរួមថ្នាក់ជាមួយកាលខ្ញុំនៅរៀនមហាវិទ្យា ល័យ ប្រើថ្នាំញៀន ដើរលេងផឹកស៊ី ដែលពួកគេគិតថាជារឿងឡូយសង្ហា អស្ចារ្យ សម្រាប់ពួកគេនៅពេលនោះ តែមកដល់ពេលនេះពួកគេពួកគេខ្លះក៏ស្លាប់ ខ្លះក៏មិនត្រូវបានសង្គមរាប់រក នេះគឺជាការពិត។
៤. ការចេះលើកលែងទោស ចំពោះចំណុចនេះអ្នកមិនគួរអនុវត្តវានៅលើដែនកំណត់ណាមួយនោះទេ ដូចជាអ្នកអនុវត្តចំពោះតែមិត្តរួមថ្នាក់ឬ មហាវិទ្យាល័យប៉ុណ្ណោះនោះទេ អ្នកត្រូវអនុវត្តចំពោះមនុស្សទូទៅដែលធ្វើខុស ដូចពាក្យស្លោកខ្មែរយើងពោលថា (ពៀររម្ងាប់ដោយការមិនចងពៀរ)។
៥. កុំដើរលេងយប់ជ្រៅ ជាពិសេសបើអ្នកជានិសិ្សតស្រីក្រមុំ ហើយអ្នកត្រូវតែប្រយ័ត្នជានិច្ច ព្រោះពេលដែលព្រះអាទិត្យលិចហើយនោះ ពួកជនខិលខូចចាប់ផ្តើមចេញមកព្រោងព្រាត ប្រសិនជាចាំបាច់នោះពេលអ្នកចេញក្រៅនៅពេលយប់ អ្នកត្រូវនាំមិត្តភ័ក្ត្រយ៉ាងតិចម្នាក់ទៅជាមួយផងទើបជាការល្អ។
៦. ជ្រើសរើសបន្ទប់ជួលឲ្យបានល្អប្រសិនបើអ្នកជានិស្សិតស្រីក្រមុំ បើសិនជាមានគួរជ្រើសរើសបន្ទប់ជួលដែលមានសុទ្ធតែស្រីៗជាការ ល្អ នេះចំពោះនិសិ្សតស្រីមកពីតាមបណ្តារខេត្តដែលជួលផ្ទះស្នាក់នៅ ព្រោះការនៅលាយឡំគ្នាមានប្រុសមានស្រី វាអាចកើតហេតុដែលអ្នកមិនអាចគិតនឹកស្មានដល់កើតឡើងមកក៏អាចថា បានដែរ។
៧. ទំនាក់ទំនងល្អជាមួយសាស្ត្រាចារ្យ ចូរកុំគិតថានៅមហាវិទ្យាល័យរាប់អានតែមិត្តភ័ក្រ្ត ជាការគ្រប់គ្រាន់នោះ អ្នកត្រូវទំនាក់ទំនងល្អជាមួយសាស្រ្តាចារ្យ ដើម្បីជួយផ្តល់ប្រឹក្សាជាច្រើនដែលទាក់ទងនិងការរៀន និង ការស្វែងរកការងារនៅថ្ងៃខាងមុខ។ ប៉ុន្តែចូរប្រយ័ត្នចំពោះសាស្ត្រាចារ្យមួយចំនួនតូចណានោះក៏មាន បំណងអ្វីមួយផ្សេងទៅវិញដែរ( ជាពិសេសចូរប្រយ័ត្នបើអ្នកជានិសិ្សតស្រី។
៨. មករៀនឲ្យទៀងទាត់ជានិច្ច ការដែលអ្នកមករៀនមិនទៀងទាត់អាចធ្វើឲ្យអ្នកបាត់បង់ព័ត៌មានមួយ ចំនួន ឧទាហរណ៍ដូចជា មិនបានពិនិត្យឈ្មោះ ក្នុងបញ្ជីរ ឬ រំលឹកមេរៀនមុនប្រលងជាដើម។ល។
៩. គិតឲ្យបានល្អិតល្អន់មុននឹងអ្នកចាប់ផ្តើមធ្វើអ្វីមួយ មិនថារឿងរៀន ឬការចូលរួមការងារសង្គម អ្នកត្រូវគិតយ៉ាងយកចិត្តទុកដាក់បំផុត មុននឹងចាប់ផ្តើមប្រតិបត្តិ។
១០. រកការងារក្រៅម៉ោងធ្វើពេលដែលអ្នកទំនេរ ព្រោះអាចធ្វើឲ្យអ្នកបានទាំងចំណូលបន្ថែម បានទាំងបទពិសោធន៍។ ចូរចាំទុកថាបទពិសោធន៍គឺមិនមានលក់នៅតាមផ្សារនោះទេ ប្រសិនជាអ្នកចង់បានត្រូវប្រលូកជាមួយវាដោយខ្លួនឯងផ្ទាល់។
១១. ខ្ញុំទើបនឹកឃើញវិធីចុះក្រោយនេះ ហើយក៏គិតថាល្អសម្រាប់អ្នករាល់គ្នាបានយកទៅអនុវត្តដែរ។ អ្នកមានដែលធ្លាប់គិតថាចាប់ផ្តើមពីថ្ងៃដំបូងដែលអ្នកឈានជើង ចូលក្នុងរបងមហាវិទ្យាល័យ ហើយបើអ្នកសាកល្បងសន្សំលុយមួយថ្ងៃ ២,០០០រៀល រហូតដល់ថ្ងៃរៀនចប់មហាវិទ្យាល័យបួនឆ្នាំ ថ្ងៃចុងក្រោយដែលអ្នកដើរចេញពីមហាវិទ្យាល័យ អ្នកមានលុយសន្សំរួចហើយគឺ ២,៩២០,០០០រៀលនៅក្នុងដៃរបស់អ្នក ដែលវាអាចឲ្យអ្នកចាប់ផ្តើមគំនិតធ្វើអាជីវកម្មជាលក្ខណៈខ្នាតតូច មួយបាន។ ហើយបើឧបមាថាអ្នកមានលុយសន្សំមួយថ្ងៃ១០,០០០រៀលវិញ ក្នុងកំឡុងពេលបួនឆ្នាំ អ្នកនឹងមាន ១៤,៦០០,០០០រៀលនៅក្នុងដៃរួចជាស្រេច។
តើអ្នកយល់យ៉ាងណាដែរចំពោះគំនិតទាំងអស់នេះ?
ទោះជាយ៉ាងណាក៏ដោយ ជីវិតរស់នៅក្នុងពេលរៀនមហាវិទ្យាល័យ វាអាស្រ័យលើការសម្របខ្លួនរបស់អ្នកដោយខ្លួនឯង ដើម្បីអនាគតអ្នកខ្លួនឯង។ អ្នកត្រូវប្រើពេលវេលាក្នុងមួយថ្ងៃៗរបស់អ្នកឲ្យអស់តម្លៃរបស់វា សម្រាប់ខ្លួនអ្នក ក្រុមគ្រួសារអ្នក អ្នកនៅជុំវិញខ្លួនអ្នក និងសង្គមរបស់យើង។
ដោយៈ ម៉ាន់ ច្ទ័នឌី
មជ្ឈមណ្ឌលសិក្សាតាមអេឡិចត្រូនិកកម្ពុជា
No comments:
Post a Comment