ភ្នំពេញ៖ សហគ្រិនជប៉ុន ជាង៣០នាក់ បានធ្វើដំណើរពីប្រទេស មកជួបជុំនឹងយុវជនកម្ពុជា ៦០០នាក់ ក្នុងសិក្ខាសាលាមួយកាលពីថ្ងៃទី២៧ មករា នៅមជ្ឈមណ្ឌលសហប្រតិបត្តិការកម្ពុជា ជប៉ុន (CJCC) ដើម្បីចែកចាយបទពិសោធភាពជោគជ័យក្នុងវិស័យជំនួញរបស់ពួកគេ។
អ្នកស្រី Wakana Nukui តំណាងអ្នករៀបចំកម្មវិធី បានប្រាប់ឱ្យដឹងថា សិក្ខាសាលានេះ ធ្វើឡើងក្នុងបំណង រឹតបន្តឹងចំណងមិត្តភាពរវាងកម្ពុជា ជប៉ុនឱ្យកាន់តែល្អប្រសើរ ព្រមទាំងដើម្បីចែករំលែកបទពិសោធទាក់ទងនឹងវិស័យធុរកិច្ច។
សហគ្រិន ឬថៅកែ ជប៉ុនទាំងនោះ បានលើកឡើងពីកត្តាជំរុញឱ្យអាជីវកម្មជោគជ័យមាន ការដឹងគុណ ការយល់និងស្វែងយល់ពីគ្នា សេក្តីស្រលាញ់ និងក្តីរីករាយជាមួយនឹងអាជីវកម្ម។
លោក Shinji Ishizuka ប្រធានក្រុមហ៊ុន Lic Place KK បាននិយាយថា៖ «ការដឹងគុណ មានតម្លៃណាស់ក្នុងភាពជោគជ័យនៃអាជីវកម្ម»។ ការដឹងគុណនេះ លោកសម្តៅទៅលើ ការផ្តល់តម្លៃលើអ្នកដែលធ្វើឱ្យការរកស៊ីរបស់សហគ្រិនដំណើរការ វាប្រៀបបីដូចជា ការដឹងគុណចំពោះអ្នកដែលបានសង្គ្រោះជីវិតស្រី្តឆ្លងទន្លេអ៊ីចឹង ដែរ។
ចំពោះអ្នកស្រី Miyuki Iida ដែលបានចាប់អាជីវកម្មលក់សម្លៀកបំពាក់ដោយខោអាវតែប្រាំកំប្លេ ប៉ុណ្ណោះ រហូតដល់បច្ចុប្បន្ន អ្នកស្រី បានក្លាយជាប្រធានក្រុមហ៊ុន Angle’s Closet KK បានផ្តល់ដំបូន្មានថា សហគ្រិនដែលជោគជ័យ គឺចេះយល់ និងស្វែងយល់ពីគ្នាជាមួយដៃគូរកស៊ីរបស់ខ្លួន។ យល់ពីគ្នាគឺយល់ពី វប្បធម៌ ស្ថានភាព របស់ដៃគូអាជីវកម្ម ដោយត្រូវដឹងថាមនុស្សមានវប្បធម៌ និងវ័យខុសគ្នា នោះការគិតក៏មានភាពខុសគ្នាដែរ។
«សេក្តីស្រលាញ់» នេះទស្សនៈវិជ្ជាធុរកិច្ចរបស់សហគ្រិន Tatsunori Saito ប្រធានក្រុមហ៊ុន Infinity KK។ លោកបានធ្វើការពន្យល់ថា សហគ្រិនត្រូវតែមានសេក្តីស្រលាញ់ ចំពោះអាជីវកម្ម ដៃគូជំនួញ និងអតិថិជនរបស់ខ្លួន ព្រោះថា«ក្រុមហ៊ុនមិនមែនមានតែយើងម្នាក់អាចដំណើរការបាននោះទេ»។
ការធ្វើជំនួញ មើលទៅហាក់ដូចជាស្មុគស្មាញ ឬតឹងតែងខ្លាំង សម្រាប់ធុរកិច្ចជនមួយចំនួន តែលោក Shinji Yamazaki ប្រធានក្រុមហ៊ុន KK Social Marketing បានឱ្យយោបល់ថា អាជីវកម្មជោគជ័យ សហគ្រិនត្រូវចេះធ្វើរីករាយនឹងវា ដោយត្រូវចេះធ្វើយ៉ាងណាឱ្យខ្លួនឯង និងបុគ្គលិក អ្នកនៅជុំវិញខ្លួន រីករាយនឹងការរកស៊ីរបស់ខ្លួន។
អ្នកចូលរួមកម្មវិធី ពិសេសយុវជនផ្ទាល់តែម្តង បានសម្តែងនូវអារម្មណ៍រីករាយ ដោយពួកគេបាននិយាយខ្លួនទទួលបានចំណេះដឹងជាច្រើន ហើយមានគំនិតចង់បើកអាជីវកម្មផ្ទាល់ខ្លួនទៀតផង។
កញ្ញា ស៊ុន រង្សី និស្សិតឆ្នាំទី៤ ផ្នែកហិរញ្ញវត្ថុនិងធនាគារ បានប្រាប់ថា៖ «សិក្ខាសាលានេះ ល្អ ព្រោះខ្ញុំបានទទួលចំណេះថ្មីៗជាច្រើន»។ កញ្ញាបន្តថា បន្ទាប់ពីចូលរួមកម្មវិធីនេះ កញ្ញាមានគម្រោងបើកអាជីវកម្ម លក់សម្ភារៈទារក និងផ្នែកពិធីការ។
យុវជនម្នាក់ទៀត ឈ្មោះ អូន សៀកឡេង និសិ្សតឆ្នាំទី៣ ផ្នែកសេដ្ឋកិច្ច និយាយថា៖«បើខ្ញុំមិនបានមកចូលរួមទេនោះ ខ្ញុំមិនបានដឹងពីគន្លឹះអាជីវកម្មនោះឡើយ»។ លោក បានយល់ឃើញថាយុវជនខ្មែរ ភាគច្រើនទាល់តែបញ្ចប់ការសិក្សាទើបចាប់ផ្តើមអាជីវកម្ម ដោយសារតែគ្មានការលើកទឹកចិត្ត។
កញ្ញា រង្សី បានអំពាវនាវដល់រដ្ឋាភិបាល ឱ្យជួយលើកទឹកចិត្តដល់យុវជនក្នុងការចាប់អាជីវកម្ម ព្រោះវាមានសារៈសំខាន់ក្នុងការជំរុញឱ្យសេដ្ឋកិច្ចកម្ពុជាដើរបាន ល្អ។ កញ្ញាបានស្នើដល់រដ្ឋាភិបាល ជួយសម្រួលដល់យុវជនដែលមានបំណងបង្កើតអាជីវកម្ម ដោយរដ្ឋគួរជួលទីតាំងក្នុងតម្លៃទាបជាងតម្លៃទីផ្សារ និងកាត់បន្ថយពន្ធដល់យុវជន។
អ្នកស្រី Kurihara បានប្រាប់ឱ្យដឹងថា សិក្ខាសាលានេះ ត្រូវបានរៀបចំឡើងជាលើកទីមួយ ហើយវានឹងត្រូវធ្វើឡើងនៅឆ្នាំបន្តបន្ទាប់ជារៀងរាល់ឆ្នាំ ពិសេសទៀតនោះ នឹងមានគម្រោងបង្កើតកម្មវិធីប្រកួតប្រជែង នាពេលខាងមុខ៕
No comments:
Post a Comment