ភាព​ជោគជ័យ​កើត​ឡើង​ ចេញ​ពី​គំនិត

នៅពេលកម្មាភិបាលខ្មែរក្រហម ប្រាប់​ឲ្យយុវជន សុក ស៊ីផាន់ណា និងកុមារ​មួយក្រុមទៀត ដែលមានសមាជិក ៩នាក់​ ស្ទូងស្រូវ ១ហិកតាក្នុងមួយ​ថ្ងៃ​នៅខេត្តកំពង់ធំ ដែលគ្រប់គ្នាដឹងថា វាមិនអាចទៅរួចនោះ លោកបានឮ​សំឡេងរអ៊ូថា «ហេតុអ្វីក៏អ្នកមិនស្ទូងឲ្យបានបីហិកតាដោយខ្លួនឯងទៅ?»នៅយប់នោះ ទាហានខ្មែរក្រហម បាន​ចង​ដៃរបស់គាត់ព័ទ្ធទៅក្រោយខ្នង ហើយនាំគាត់ក្នុងវាលស្រែ ហើយចងគាត់នៅដំបូកឲ្យស្រមោច​ខាំ​ពេញមួយយប់។ គាត់ដឹងថា គាត់នឹងស្លាប់ ឬការឈឺចាប់របស់គាត់នឹងបញ្ចប់ ការគិតថា អ្វីៗនឹង​ត្រូវបញ្ចប់នេះ បានផ្តល់ឲ្យភាពសុខស្រួលដល់រូបគាត់។
លោក បានថ្លែងថា៖ «ក្នុងសម័យនោះ ខ្ញុំគិតថាចង់ស្លាប់ ដោយសារការស្លាប់នៅពេលនោះ គឺជា​សេរីភាព។ ខ្ញុំដឹងថា បើខ្ញុំមិនស្លាប់ ខ្ញុំត្រូវរស់នៅឲ្យបានប្រសើរជាងនេះ។ នេះគឺជាប្រភពនៃក្តីសង្ឃឹម។ អ្នកនៅតែរង់ចាំថ្ងៃមួយ ដែលសេរីភាពនឹងមកដល់។ ជីវិតគឺដូចគ្នា។ តើអ្នកមានថ្ងៃស៊យដែរទេ? ថ្ងៃស្អែកប្រាកដជាល្អប្រសើរមិនខាន។ ការកេងលក់ស្រួល​ពេញមួយ​យប់ នឹងផ្លាស់ប្តូរបញ្ហាជាច្រើន»។បច្ចុប្បន្ន បន្ទាប់ពីបានទទួលសញ្ញាបត្រផ្នែកច្បាប់ពីអាមេរិក និង​អូស្រ្តាលី គាត់បើកក្រុមហ៊ុនច្បាប់មួយនៅកម្ពុជា និងមានតួនាទីជាទីប្រឹក្សារដ្ឋាភិបាល​របស់លោក​នាយករដ្ឋមន្ត្រី ហ៊ុន សែន ដោយមិនទទួលបានប្រាក់បៀវត្សរ៍។ បច្ចុប្បន្ន គាត់នៅទីក្រុងញូវយ៉ក ដើម្បីបញ្ចុះបញ្ចូលឲ្យកម្ពុជា បានក្លាយជាសមាជិកមិនអចិន្រៃ្តយ៍ក្នុងក្រុមប្រឹក្សាសន្តិសុខ សហ​ប្រជាជាតិ។
លោកមានប្រសាសន៍ថា៖ «ការក្លាយជាសមាជិករបស់ក្រុមប្រឹក្សាសន្តិសុខសហប្រជាជាតិ បើទោះ​ជា​ត្រូវ​ប្តូរវេនរៀងរាល់ពីរឆ្នាំម្តងក្តី វាបង្ហាញថា ប្រទេសរបស់អ្នក មានភាពចាស់ទុំ និងប្រទេសរបស់​អ្នក ក៏ដូចជាប្រទេសផ្សេងទៀតដែរ ដោយអ្នកមានសំឡេង តួនាទី ជំហរ និងទស្សនៈមួយ»។
លោក សុក ស៊ីផាន់ណា បានឲ្យដឹងថា ប្រទេសកម្ពុជាកំពុងស្ទុះងើបឡើងទៅមុខ ក្រោយពីវិបត្តិ​រយៈពេល២០ឆ្នាំ។
លោក បានបន្តថា៖«យើងចង់ឲ្យមនុស្សដឹងថា យើងមានសមត្ថភាពចូល​រួមចំណែកដល់សន្តិភាព​ដល់មនុស្សជាតិ និងពិភពលោក។ យើងអាចចូលរួមចំណែកបានច្រើន។ បច្ចុប្បន្ន យើងបានបញ្ជូន​កងកម្លាំងរដ្ឋកម្ពុជាឲ្យចូលរួមជាមួយកងកម្លាំង រក្សា សន្តិភាពរបស់អង្គការសហប្រជាជាតិ​នៅជុំវិញ​ពិភពលោក»។
នៅ ខែ តុលាខាងមុខនេះ មហាសន្និបាតអង្គការសហប្រជាជាតិ នឹងធ្វើការបោះឆ្នោតដោយសម្ងាត់​ថា តើកម្ពុជា ប៊ូតង់ ឬកូរ៉េខាងត្បូង នឹងមានអាសនៈមួយនៅក្នុងក្រុមប្រឹក្សាសន្តិសុខ​សហប្រជា​ជាតិ។​ លោក សុក ស៊ីផាន់ណា កំពុងនៅទីក្រុងញូវយ៉ក បញ្ចុះបញ្ចូលមន្ត្រីការទូតរបស់បណ្តាប្រទេសនានា ឲ្យបោះឆ្នោតឲ្យកម្ពុជា។ ដំណើរការនេះ បាន​ធ្វើ​ឡើងរៀងរាល់ពីរឆ្នាំម្តង យោងទៅតាមអនុតំបន់។
លោកបាន បន្តថា៖​ «បច្ចុប្បន្ន កម្ពុជាកំពុងស្ថិតក្នុងស្ថានភាពមួយដែលអាចឈរជាបេក្ខភាពដូច ប្រទេសផ្សេងទៀតដែរ។ ពិភពលោកត្រូវដឹងថា យើងមានលក្ខណសម្បត្តិគ្រប់គ្រាន់ ដូច​ប្រទេស​ផ្សេងទៀតដែរ»។នេះគឺជាករណី ដែលលោកកំពុងបំពេញការងារតំណាងឲ្យកម្ពុជា។
លោក មានប្រសាសន៍បន្តថា៖ «សូមក្រឡេកមើលតំបន់នេះ កម្ពុជាមានបទពិសោធច្រើនក្នុង​ការផ្សះ​ផ្សា និងកសាងជាតិ។ បច្ចុប្បន្នប្រទេសមីយ៉ាន់ម៉ា ក៏ដូចជា ប្រទេសកម្ពុជាកាលពី ១៥ឆ្នាំមុន​ដែរ។ មីយ៉ាន់ម៉ា អាចអនុវត្តតាមកម្ពុជាបាន ដោយសារប្រទេសទាំងពីរមានទិសដៅក្នុងការអភិវឌ្ឍ​ក្រោយវិបត្តិស្រដៀង គ្នា។ មីយ៉ាន់ម៉ា អាចស្វែងយល់កាន់តែងាយស្រួលពីយើងទាំងអស់គ្នានៅ​កម្ពុជា ជាជាងស្វែងយល់ពីតំបន់អឺរ៉ុប ឬអាមេរិក»។
លោក សុក ស៊ីផាន់ណា បានឲ្យដឹងថា បើកម្ពុជាទទួលបានអាសនៈនេះ កម្ពុជានឹងទទួលបាន​នូវការ​គោរព និងមានសមត្ថភាពចូលរួមចំណែកក្នុងគោលនយោបាយពិភពលោក។
លោក​បាន ​បន្ត​ថា៖ «យើងនឹងមានលទ្ធភាពចូលរួមចំណែកដល់សន្តិភាពពិភពលោក និងចូលរួម​ក្នុង​ការពិភាក្សាជាសកល ព្រមទាំងធ្វើឲ្យប្រទេសដ៏តូចរបស់យើងក្លាយជាតំណាងមួយក្នុងការ ពិភាក្សា​ស្តីពីបម្រែបម្រួលអាកាសធាតុ ការអភិវឌ្ឍប្រកបដោយនិរន្តរភាព សន្តិសុខ បញ្ហានុយក្លេ​អ៊ែរ ហើយយ៉ាងហោចណាស់ យើងអាចបង្ហាញឲ្យពិភពលោក បានឮសំឡេងរបស់យើង»។
លោក សុក ស៊ីផាន់ណា កើតនៅឆ្នាំ១៩៦០ គឺជាកូនប្រុសរបស់វរសេនីយ៍ទោមួយរូប​នៃកងយោធ​ពល​ខេមរភូមិន្ទ។ លោកបានទៅសិក្សានៅប្រទេសបារាំង កាលពីនៅក្មេង ហើយលោក​គឺជាកូន​ទីបីក្នុងចំណោមបងប្អូន ៦នាក់។ លោកមានប្រសាសន៍ថា ភាពជោគជ័យ មានលក្ខណៈ​ស្រពេច​ស្រពិល ដូចជាដុំពពកអ៊ីចឹង។
«យើង ឃើញពពកមានរូបរាងខុសៗគ្នា ខ្ញុំអាចយល់ឃើញខុសពីអ្វីដែលអ្នកដទៃទៀតយល់។ ខ្ញុំយល់ថា ភាពជោគជ័យពាក់ព័ន្ធនឹងអ្វីដែលអ្នកយល់ឃើញក្នុងជីវិត។ បើអ្នកផ្តល់តម្លៃដល់របស់​អ្វីមួយ នៅពេលនោះ អ្នកនឹងកំណត់ជោគជ័យរបស់អ្នកទៅលើបញ្ហានោះ។ បើអ្នកយល់ថា ការមាន​រថយន្តល្អមួយ នឹងធ្វើឲ្យអ្នកសប្បាយចិត្តនោះ នៅពេលនោះអ្វីដែលធ្វើឲ្យអ្នកសប្បាយរីករាយនោះ គឺការមានរថយន្តល្អជិះ»។«នៅពេលមនុស្សកំណត់និយមន័យនៃពាក្យ ជោគជ័យ ពួកគេនឹងក្លាយ​ជា​អ្នកទោសនៃក្តីស្រមៃរបស់ខ្លួន។ នៅពេលអ្នកក្លាយជាអ្នកទោសនៃសម្ភារនិយម នោះអ្នកនឹង​បរាជ័យ ដោយសារអ្នកនឹងមិនមានលទ្ធភាពសម្រេចក្តីស្រមៃនោះបាន។ ជោគជ័យគឺជា​ដំណើរការ​មួយ ដើម្បីស្វែងយល់ពីអត្ថន័យនៃភាពជោគជ័យ មនុស្សម្នាក់ត្រូវក្រឡេកមើលសភាពខាងក្នុង ជា​ជាងការក្រឡេកមើលសភាពខាងក្រៅ»។
លោកបានថ្លែងថា បើទោះជាលោកមិនអាចដឹងពីការសម្ងាត់នៃភាពជោគជ័យក្តី តែលោកបាន​ដល់​ពី​ការ​សម្ងាត់​នៃភាពបរាជ័យ។
លោក ថ្លែងថា៖ «ការសម្ងាត់នៃបរាជ័យគឺការព្យាយាមធ្វើឲ្យមនុស្សរាល់គ្នារីករាយ។ ចូលប្រកាន់​គោលការណ៍របស់អ្នក។ កុំព្យាយាមធ្វើឲ្យអ្នករាល់គ្នារីករាយ។ ត្រូវស្មោះចំពោះខ្លួនឯង។ នៅពេល​អ្នកព្យាយាមធ្វើឲ្យអ្នកដទៃរីករាយ អ្នកនឹងរងទុក្ខ»។
លោក បន្តថា៖ «សន្តិសុខគឺជាគន្លឹះនៃភាពជោគជ័យ។ វាគឺជាគំនិត វាគឺជាអារម្មណ៍នៅពេលទៅផ្ទះ​បន្ទាប់ពីបានទស្សនាភាពយន្ត អ្នកចូលគេងក្នុងរយៈពេល ៥នាទី ដោយគ្មានស្រេ្ដស។ នៅពេល​លោកអ្នកធ្វើរឿងដែលត្រឹមត្រូវ ចូរកុំបារម្ភ។ អ្នកបារម្ភតែរឿងណាដែលអ្នកបានធ្វើហួសពី​គោល​ការណ៍របស់អ្នកបាន ហើយ។ ប៉ុន្តែច្បាស់លាស់ចំពោះខ្លួនអ្នក គោរពអ្នកដទៃ»៕
(អត្ថបទដកស្រង់ពីកាសែតភ្នំពេញ ប៉ុស្តិ៍)