ស្នេហ៍អមតៈ: ខ្មែរណាខ្លះជាប់ជាវីរបុរស CNN?

Friday, September 6, 2013

ខ្មែរណាខ្លះជាប់ជាវីរបុរស CNN?

អ្នកស្រី នូន ភិមាន និងលោក អាគី រ៉ា គឺជាប្រជាជនខ្មែរដែលបានក្លាយជាវីរបុរសរបស់ទូរទស្សន៍ដ៏ល្បីជាង គេបង្អស់ក្នុងពិភពលោក នោះគឺទូរទស្សន៍CNN តាមរយៈកម្មវិធី CNN Hero។
កម្មវិធីនេះអនុញ្ញាតឲ្យប្រជាជនទូទាំងសាកលលោក អាចដាក់ពាក្យតែងតាំងនរណាម្នាក់ ជាវីរបុរសបាន បើខ្លួនគិតថា គាត់នោះសក្ដិសមជាវីរបុរស តាមរយៈការលះបង់របស់គាត់ជួយសង្គម។ ក្រុម ការងាររបស់ទូរទស្សន៍មួយនេះនឹងចុះមកផ្ទាល់ដើម្បីស៊ើបអង្កេត ថាតើមនុស្សដែលត្រូវបានតែងតាំងនោះ គឺសក្ដិសមជាវីរបុរសមែន ឬយ៉ាងណា។
បើមនុស្សដែលត្រូវបានគេតែងតាំងនោះ គឺពិតជាសក្ដិសមមែន ជីវប្រវត្តិរបស់គាត់នឹងត្រូវបានចងក្រងឡើង និងចុះផ្សាយលើទំព័រ CNN　Heroes ដើម្បីធ្វើការបោះឆ្នោតរក Top 10 CNN Heroes។
អ្នកស្រី នួន ភិមាន បានជាប់ជាវីរនារី CNN នៅឆ្នាំ២០០៨ ដោយសារអ្នកស្រីបានលះបង់ប្រយោជន៍ផ្ទាល់ខ្លួន ដោយបោះចោលការងារផ្ទាល់ខ្លួន សុខចិត្តមកធ្វើការងារសង្គម ជួយផ្ដល់ម្ហូបអាហារ និងការអប់រំ ដល់កុមារដែលរស់នៅកន្លែងចាក់សំរាមស្ទឹងមានជ័យ។

ចំណែកលោក អាគី រ៉ា វិញ បានស្ម័គ្រចិត្តធ្វើការដោះមីនយ៉ាងប្រថុយប្រថានបំផុត ដោយពុំមានការប្រើប្រាស់ឧបករណ៍បច្ចេកទេសត្រឹមត្រូវឡើយ។ ក្រៅពីការងារជួយដោះមីននៅកម្ពុជា លោកបានចិញ្ចឹមកុមាររង់គ្រោះដោយគ្រាប់មីន និងក្រោយមកបានបង្កើតសារមន្ទីរដ៏ល្បីនៅខេត្តសៀមរាប នោះគឺសារមន្ទីរមីន ដែលទាក់ទាញភ្ញៀវមកទស្សនាពុំដែលដាច់។ លោកបានជាប់ជាវីរបុរស CNN នៅឆ្នាំ២០១០។