ស្នេហ៍អមតៈ: ១០សំណួរមុនជ្រើសនរណាម្នាក់ជាដៃគូអាជីវកម្ម

ដូចគ្នា ទៅនឹងការរៀបការដែរ ការស្វែងរកដៃគូអាជីវកម្មផ្ដើមចេញពីការពេញចិត្ត និងជឿជាក់គ្នា ហើយបើមិនមើលឲ្យគ្រប់ជ្រុងជ្រោយទេនោះ អ្វីៗនឹងបញ្ចប់ដោយការបែកបាក់ ឬឈានដល់ផ្លូវតុលាការមិនខាន។

ដូច្នេះ វាជារឿងសំខាន់ដែលអ្នកត្រូវស្វែងយល់ឲ្យបានកាន់តែច្រើនតាមដែល អាចធ្វើបានពីដៃគូសក្ដានុពលរបស់អ្នក មុននឹងចុះហត្ថលេខាព្រមព្រៀងធ្វើជាដៃគូអាជីវកម្មណាមួយជាមួយគ្នា។

ដើម្បីសម្រេចចិត្តបានប្រសើរ អ្នកអាចសាកល្បងសួរសំណួរខ្លួនឯង នូវសំណួរទាំង ១០ ខាងក្រោម៖

១. តើអ្វីដែលខ្ញុំត្រូវការពីដៃគូអាជីវកម្ម?

អ្នកត្រូវសម្លឹងរកដៃគូជំនួញណា ដែលមានអ្វីថ្មីមកពិភាក្សាលើតុជាមួយអ្នក។ ប្រសិនបើអ្នកជាមនុស្សច្នៃប្រឌិត អ្នកប្រហែលជាត្រូវការមនុស្សដែលមានភាពលម្អិតបន្ថែមទៀត។ ប្រសិនបើអ្នកមានលុយ អ្នកប្រហែលជាត្រូវការមនុស្សដែលមានទីផ្សារ ឬទំនាក់ទំនងល្អជាមួយសង្គមខាងក្រៅ។

”ប្រសិនបើដៃគូរបស់អ្នកជាមនុស្ស ស្រដៀងនឹងអ្នក នឹងធ្វើឲ្យអ្នកមានអារម្មណ៍កក់ក្ដៅ ប៉ុន្តែមិនជាអ្វីដែលអ្នកត្រូវការពិតប្រាកដនោះទេ”។ នេះការលើកឡើងរបស់លោក William M. Moore ស្ថាបនិក Moore Firm ក្នុងទីក្រុង San Diego សហរដ្ឋអាមេរិក។ អ្នកជំនាញដដែលបន្តថា ដៃគូអាជីវកម្មគួរជាមនុស្សម្នាក់ដែលអាចបំពេញបន្ថែមជំនាញ និងបុគ្គលិកលក្ខណៈដែលអ្នកនៅខ្វះចន្លោះ។

អាន៖ នៅពីក្រោយជោគជ័យ ១០០លានដុល្លាររបស់យុវតីវ័យ ២៣ឆ្នាំ

២. តើស្ថានភាពហិរញ្ញវត្ថុរបស់ដៃគូសក្ដានុពលរបស់អ្នកយ៉ាងណា?

ជារឿងសំខាន់ដែលអ្នកត្រូវដឹងពី ស្ថានភាពហិរញ្ញវត្ថុ និងការតាំងចិត្តរបស់ដៃគូរបស់អ្នកមុននឹងលោតប្រឡូកអាជីវកម្ម ណាមួយជាមួយគ្នា។ វាដូចជាលំបាក និងមិនសមរម្យក្នុងការសួរពីហិរញ្ញវត្ថុ ឬការចំណាយរបស់នរណាម្នាក់ ប៉ុន្តែស្ថានភាពហិរញ្ញវត្ថុមានទំនាក់ទំនងគ្នានៅការសម្រេចចិត្ត ណាមួយនាអនាគត។

៣. តើដៃគូសក្ដានុពលរបស់អ្នក នឹងចែករំលែកពេលវេលាបែបណាទៅលើអាជីវកម្មរបស់អ្នក?

ពាក្យថា ដៃគូមិនប្រាកដថា ត្រូវចំណាយពេលស្មើគ្នាទៅលើអាជីវកម្មនោះទេ ប៉ុន្តែគួរស្ថិតក្នុងកម្រិតសមល្មមណាមួយដែលអាចទទួលយកបាន។ តើក្នុងមួយថ្ងៃ ដៃគូរបស់អ្នកចំណាយពេលប៉ុន្មានម៉ោងទៅលើអាជីវកម្មរួមគ្នានោះ ហើយថាតើរយៈពេលនោះ គ្រប់គ្រាន់តាមការចង់បានរបស់អ្នកឬទេ? ដៃគូល្អត្រូវចេះផ្ដល់តម្លៃគ្នាទៅវិញទៅមក ចំពោះពេលវេលាដែលដៃគូលះបង់ដើម្បីអាជីវកម្ម។

អាន៖ ១០ចំណុចស្វែងយល់ពីទំនាក់ទំនង!

៤. តើការតាំងចិត្តរបស់ដៃគូទៅលើអាជីវកម្មថ្មីខ្លាំងដូចអ្នកដែរឬទេ?

“ខ្ញុំមិនសំដៅថា អាជីវកម្មនោះជាហាងកាហ្វេ ជាក្រុមហ៊ុនឌីហ្សាញអីទេ ប៉ុន្តែការតាំងចិត្តរបស់ដៃគូជំនួញត្រូវខ្លាំងដូចគ្នា”។ នេះជាការគូសបញ្ជាក់របស់លោក Bob Phibbs អ្នកប្រឹក្សា និងជាអគ្គនាយកគេហទំព័រ The Retail Doctor ដែលជាកន្លែងផ្ដល់ព័ត៌មានដល់ជំនួញខ្នាតតូច និងមធ្យម។ ភាពជាដៃគូ ពិសេសរវាងមិត្តភ័ក្ដិ អាចផ្ដើមឡើងដោយភាពរីករាយ និងរំភើប ប៉ុន្តែខ្លីប៉ុណ្ណោះ។ ប៉ុន្តែបើសិនដៃគូរបស់របស់អ្នកមិនសូវតាំងចិត្តខ្លាំងដូចអ្នក ភាពរីករាយដែលគេមាននឹងបាត់បង់បន្តិចម្ដងៗ ហើយអាចប៉ះពាល់ដល់ក្រុមហ៊ុនបន្តិចម្ដងៗដូចគ្នាដែរ។

៥. តើជីវិតគ្រួសាររបស់ដៃគូអ្នកអាចប៉ះពាល់ដល់អាជីវកម្មឬទេ?

ព្យាយាមស្វែងយល់ពីជីវិតដៃគូរបស់ អ្នក។ តើគ្រួសាររបស់គេគាំទ្រការចាប់ផ្ដើមអាជីវកម្មថ្មីដែរឬទេ? តើអាចមានការជ្រៀតជ្រែកពីគ្រួសាររបស់គេមកលើការសម្រេចណាមួយឬ អត់? បើមានបញ្ហាធំណាមួយពាក់ព័ន្ធនឹងគ្រួសារដៃគូអ្នក នោះអ្វីៗអាចនឹងរកាំរកូសតាំងពីចាប់ផ្ដើមតែម្ដង។

៦. តើនៅដំណាក់កាលលំបាកដៃគូរបស់អ្នកនឹងមានដំណោះស្រាយរបៀបម៉េច?

ការយល់ដឹងពីការដំណោះស្រាយដែលនៅ ស្ថានភាពពីដៃគូរបស់អ្នកក៏ជារឿងដែលត្រូវយល់ដឹងដែរ។ លោក Bob Phibbs បានបកស្រាយថា វិធីសាស្ត្រដ៏ល្អបំផុតក្នុងការស្វែងយល់ពីវិធីដោះស្រាយការងារ របស់ដៃគូគឺអាចធ្វើតាមរយៈការសង្កេតមើលសកម្មភាពពីមុនៗរបស់គេ។ តើគេជាមនុស្សគោរពពេលវេលា ធ្វើអ្វីតាមកាលកំណត់ឬទេ? ស្វែងយល់កាន់តែច្រើនដោយខ្លួនឯង ព្រោះទង្វើរបស់គេពីមុនពាក់ព័ន្ធនឹងអត្តចរិតដែលពិបាកនឹងប្ដូរ។

៧. តើគេមានចម្ងល់អីសួរមកអ្នកវិញទេ?
នៅក្នុងបទសម្ភាសជ្រើសរើសបុគ្គលិកម្នាក់ បើសិនគេមិនមានសំណួរ១ ឬ ២ សួរពីក្រុមហ៊ុនអ្នក ក៏ប្រហែលជាមិនជ្រើសរើសគេឲ្យចូលធ្វើការដែរ ព្រោះនោះបញ្ជាក់ថា គេមិនសូវចាប់អារម្មណ៍លើក្រុមហ៊ុនអ្នក។ ដៃគូអាជីវកម្មក៏មិនខុសគ្នាដែរ បើគេពិតជាខ្វល់ខ្វាយ និងយកចិត្តទុកដាក់ខ្លាំង គេក៏ប្រាកដជាចង់ដឹងពីអ្នកកាន់តែច្រើន ដូចដែលអ្នកចង់ដឹងពីគេដែរ។ សំណួរដែលគេសួរមកកាន់អ្នកអាចពាក់ព័ន្ធនឹងអត្តចរិតរបស់អ្នក ភាពអាចពឹងពាក់បាន និងក្ដីសង្ឃឹមដែលគេមានមកលើអ្នកជាដើម។

៨. តើដៃគូរបស់អ្នកមានមុខមាត់កម្រិតណានៅក្នុងសហគមន៍?
មនុស្សជាច្រើនមើលទៅដូចជាជំនាញខ្លាំងណាស់នៅពេលដំបូង ប៉ុន្តែនៅពេលចូលទៅដល់សាច់ការណ៍បែរជាមិនដឹងចាត់ចែងដោយរបៀបណា ទៅវិញ។ សាកសួរមនុស្សដែលធ្លាប់ស្គាល់ និងនៅជុំវិញគេ ថាដៃគូរបស់អ្នកជាមនុស្សបែបណា។ ដៃគូជំនួញរបស់អ្នកគួរជាមនុស្សដែលហ៊ាននិយាយហ៊ានធ្វើ មិនមែននិយាយឲ្យតែរួចៗនោះទេ។ ទំនាក់ទំនងរបស់គេនៅក្នុងសហគមន៍ក៏ជះឥទ្ធិពលខ្លាំងណាស់ដែរទៅលើ អាជីវកម្មរបស់អ្នក។

អាន៖ ១០ចំណុចស្វែងយល់ពីទំនាក់ទំនង!

៩. តើគេបើកចិត្តឲ្យមានការព្រមព្រៀងគ្នាជាលាយលក្ខណ៍អក្សរដែរឬទេ?
ភាពជាដៃគូច្រើនផ្ដើមចេញតាមរយៈការចាប់ដៃគ្នា ដោយមិនមានការព្រមព្រៀងជាលាយលក្ខណ៍អក្សរពោលគឺ មកពីទុកចិត្តគ្នាពេក។ ពេលព្រមព្រៀងគ្នាជាលាយលក្ខណ៍អក្សរត្រូវនឹករកសរសេរពីផលលំបាក ដែលនឹកឃើញទាំងអស់បញ្ចូលទៅក្នុងនោះ និងដំណោះស្រាយចំពោះបញ្ហានីមួយៗ។ បើចេះតែហៃអើៗ ដល់ថ្ងៃក្រោយមានបញ្ហាមិនដឹងជាត្រូវបន្ទោសអ្នកណានោះទេ ព្រោះអ្វីៗមិនបានព្រមព្រៀងឲ្យច្បាស់លាស់ពីដំបូង។ ឧទាហរណ៍ថា អ្នកចាប់ដៃគូជាមួយគ្នាហើយ ដល់ពេលចាប់ផ្ដើមដំបូង ៦ ខែ ដៃគូរបស់អ្នកមានបញ្ហាគ្រួសារ ឬបញ្ហាអ្វីមួយដែលតម្រូវឲ្យគេចាកចេញរយៈពេលយូរណាមួយ តើនឹងមានអ្វីប៉ះពាល់ដល់អាជីវកម្មរបស់អ្នក? ហើយបើភាគីណាមួយ មិនថា អ្នក ឬដៃគូរបស់អ្នកមិនបានអនុវត្តតួនាទីខ្លួនឯងឲ្យបានពេញលេញក្នុង ដំណើរអាជីវកម្មទេនោះ តើអាចមានវិធានការអ្វីដោះស្រាយដែរឬទេ? ដំណោះស្រាយអាចដូចជាការកាត់ភាគលាភ ឬផ្ដល់ឱកាសមួយលើក ឬពីរលើកមុននឹងសម្រេចចិត្តបណ្ដេញចេញ ប្រសិនបើស្ថិតក្នុងករណីចាំបាច់ជាដើម។

១០. តើខ្ញុំពិតជាត្រូវការដៃគូដែរឬទេដើម្បីដំណើរការអាជីវកម្មទៅបាន?
វិភាគឲ្យបានគ្រប់ជ្រុងជ្រោយជាមុនសិនថា តើអ្នកពិតជាត្រូវការដៃគូដោយអត់មិនបានមែនទេ ដើម្បីឲ្យអាជីវកម្មរបស់អ្នកអាចដំណើរការបាន? បើពិតជាអត់មិនបានមែន ទើបអ្នកគួរចាប់ដៃគូជាមួយនរណាម្នាក់។ បើអ្នកមានគំនិត ប៉ុន្តែគ្មានថវិកា ជៀសមិនរួចអ្នកត្រូវស្វែងរកដៃគូដែលអាចឧបត្ថម្ភជាថវិកាដល់អ្នក ដោយខានមិនបាន។ ប៉ុន្តែបើអ្នកមានលុយ មានគំនិតទៀតនោះ គ្រាន់តែជួលបុគ្គលិកដែលមានជំនាញមកអនុវត្តតាមគម្រោងរបស់អ្នក ជាការស្រេច។ លោក William M. Moore ថា បើមានលុយជួលឲ្យអ្នកដទៃធ្វើការឲ្យគួរជ្រើសរើសយកជម្រើសនេះជា ជាងការផ្ដល់ចំណែកភាគហ៊ុនដល់នរណាម្នាក់ ព្រោះបើអាជីវកម្មដំណើរការល្អផលចំណេញទាំងប៉ុន្មាននឹងធ្លាក់មកលើ អ្នកទាំងមូលតែម្ដង៕

ស្នេហ៍អមតៈ

Pages

Tuesday, September 3, 2013

១០សំណួរមុនជ្រើសនរណាម្នាក់ជាដៃគូអាជីវកម្ម

No comments:

Pages

Tuesday, September 3, 2013

១០​សំណួរ​​​មុន​​​ជ្រើស​នរណា​ម្នាក់​ជា​ដៃគូ​អាជីវកម្ម​

No comments:

១០សំណួរមុនជ្រើសនរណាម្នាក់ជាដៃគូអាជីវកម្ម