កម្មករ កម្មការនីរោងចក្រកាត់ដេរ ចូលរួមធ្វើបាតុកម្មនៅទីលានប្រជាធិបតេយ្យនៅថ្ងៃទី ២៥ ខែធ្នូ ឆ្នាំ ២០១៣។
@RFI/sophal
នៅថ្ងៃពុធទី២៥ខែធ្នូនេះក្រុមកម្មកររោងចក្រកាត់ដេរ
រាប់ម៉ឺននាក់បានបន្តកូដកម្មនៅច្រើនកន្លែងផ្សេងគ្នា
នៅតាមបណ្តារោងចក្រជាច្រើននៅភ្នំពេញខេត្តកំពង់ស្ពឺកំពង់ចាមកំពង់
ឆ្នាំងខេត្តស្វាយរៀងនិងនៅកន្លែងផ្សេងៗទៀត។កម្មករតវ៉ានៅថ្ងៃ
នេះដើម្បីប្រឆាំងនឹងសេចក្តីសម្រេចតម្លើងប្រាក់ខែត្រឹមតែ៩៥ដុល្លារ
នៅឆ្នាំ២០១៤។ក្រុមសហជីពនិងកម្មករអ្នកតវ៉ាទាមទារឲ្យមានការចរចា
ឡើងវិញប៉ុន្តែ ក្រសួងការងារបដិសេធ។
មេដឹកនាំសហជីពកម្មករ លោក អាត់ ធន់ បានឲ្យដឹងថា
គិតត្រឹមល្ងាចថ្ងៃទី២៥ ខែធ្នូ
មានផ្ទុះបាតុកម្មនិងកូដកម្មកម្មកររោងចក្រជាង ៧០
រោងចក្រនៅក្នុង ៧ខេត្តរាជធានី។ កម្មករជាង ១០ ម៉ឺននាក់
បាននាំគ្នាធ្វើកូដកម្មនិងបាតុកម្មដោយអ្នកខ្លះធ្វើនៅនឹងកន្លែង
អ្នកខ្លះបានដើរហែក្បួន
និងខ្លះទៀតបានទៅចូលរួមជាមួយបាតុកម្មរបស់គណបក្សសង្គ្រោះជាតិ។បើតាមលោកអាត់ធន់ កូដកម្មនិងបាតុកម្មទាំងនោះបានផ្ទុះឡើងនៅភ្នំពេញ ខេត្តកំពង់ចាម កំពង់ស្ពឺ កំពង់ឆ្នាំង ស្វាយរៀង កណ្តាល និងខេត្តព្រៃវែង។ ក្រុមកម្មករបានទាមទារឲ្យមានការចរចាឡើងវិញអំពីការដំឡើងប្រាក់ ខែជូនកម្មកររហូតដល់ ១៦០ ដុល្លារក្នុងមួយខែ។
ប៉ុន្តែ លោក វង្ស សុវណ្ណ មន្ត្រីក្រសួងការងារទទួលបន្ទុកដោះស្រាយជម្លោះបាតុកម្មកូដកម្ម អះអាងថា ក្នុងចំណោម៩០សហជីពទូទាំងប្រទេសមានតែ៤ឬ៥សហជីពប៉ុណ្ណោះដែលមិន ទទួលយកសេចក្តីសម្រេចរបស់ក្រុមប្រឹក្សាការងារ។ លោក វង្ស សុវណ្ណ អះអាងថា បាតុកម្ម និងកូដកម្មថ្ងៃនេះជារឿងខុសច្បាប់។ មន្ត្រីរូបនេះបញ្ជាក់ថា សេចក្តីសម្រេចនេះនឹងចូលជាធរមាន ហើយគ្មានការចរចាឡើងវិញនោះទេ។
គួរបញ្ជាក់ថា ការផ្ទុះបាតុកម្ម និងកូដកម្មកម្មករនៅថ្ងៃនេះបានកើតឡើងបន្ទាប់ពីក្រុមប្រឹក្សា ការងារបានសម្រេចកាលពីថ្ងៃទី ២៤ ធ្នូ ដំឡើងប្រាក់ខែកម្មករឲ្យដល់ ១៦០ ដុល្លារ ក្នុងមួយខែប៉ុន្តែ ត្រូវរង់ចាំរហូតដល់៥ឆ្នាំទៀត។ ចាប់ពីឆ្នាំ ២០១៤ តទៅ ការដំឡើងមានតែចំនួនពី ១៥ ដល់ ១៧ ដុល្លារប៉ុណ្ណោះក្នុងមួយឆ្នាំ។
កាលពីរសៀលថ្ងៃទី២៤ធ្នូ ក្រសួងការងារបានចេញសេចក្តីអំពាវនាវ ដល់កម្មករ និងសហជីពឲ្យរក្សាភាពស្ងប់ស្ងាត់ និងបន្តការងារជាធម្មតា ជៀសវាងការធ្វើសកម្មភាពណាមួយ ដែលអាចធ្លាក់ក្នុងអន្ទាក់នយោបាយ ធ្វើឲ្យខាតបង់ប្រយោជន៍របស់កម្មករ ក៏ដូចជា ប្រទេសជាតិទាំងមូល។ ប៉ុន្តែ មេដឹកនាំសហជីព លោក អាត់ ធន់ បានឆ្លើយតបថា ការធ្វើបាតុកម្ម និងកូដកម្មគឺជាសិទ្ធិរបស់កម្មករ៕
No comments:
Post a Comment