និយាយនៅក្នុងសាលសន្និសីទ នៃវិទ្យាស្ថានជាតិអប់រំ កាលពីព្រឹកមិញនេះ ក្នុងវេទិកា”ជួបជាមួយថ្នាក់ដឹកកំពូលនៃក្រុមហ៊ុននិងសហគ្រាស ឧស្សាហកម្មជាតិ និងអន្តរជាតិ” លោក បណ្ឌិត ឡី សុភាព នាយកក្រុមហ៊ុន Smart Business Group លើកឡើងថា “មកដល់ពេលនេះ និស្សិតទាំងអស់មិនមែនជាពេលត្រូវសប្បាយចិត្ត ឬលេងសើចនោះទេ តែជាពេលដែលគ្រប់គ្នាត្រូវសង្វេគ”។
” ដោយមិនមិនបាច់គិតពីអ្នកនៅមុខ ក្រោយ ខាងឆ្វេង ឬខាងស្ដាំទេ អ្នកទាំងនោះមិនមែនជាចាំជួយអ្នកទេ តែគឺគិតតែពីខ្លួនអ្នកសិន ” នេះជាការគូសបញ្ជាក់របស់ បណ្ឌិត ខាងលើ ក្នុងន័យចង់លើកទឹកចិត្តយុវវ័យទាំងអស់ចាប់ផ្ដើមធ្វើអ្វីមួយដែល នាំអ្នកទៅរកជីវិតដ៏ជោគជ័យមួយ។
នៅចំពោះមុខនិស្សិត ជាង៣០០ នាក់ លោក ឌៀម សីហា សកលវិទ្យាធិការនៃសាកលវិទ្យាល័យ បៀលប្រាយ មានប្រសាសន៍យ៉ាងជឿជាក់ថា ” គំនិត អាចផ្លាស់ប្ដូរអ្វីៗទាំងអស់បាន តែគ្មាននរណាម្នាក់មានគំនិតអស្ចារ្យ ហើយភាពជោគជ័យអាចសម្រេចបានដោយលំបាក”។
ដើម្បីសម្រេចជោគជ័យបាននោះ លោកចង់ឲ្យនិស្សិតទាំងអស់ ចេះស្រលាញ់ និងគ្រប់គ្រងពេលវេលាឲ្យបានល្អដោយការខិតខំប្រឹងប្រែងសិក្សា ទទួលចំណេះដឹង បទពិសោធន៍ជានិច្ច “ត្រូវចាំថាអ្នករៀនរហូត ការអនុវត្តក៏ជាការរៀនដែរ…ដូចនេះសូមប្រើការគិតរបស់អ្នកបង្កើត ទម្លាប់ជាំអ្នករៀនចង់ចេះ ចង់ដឹងគ្រប់ពេល។
បន្ថែមអត្ថន័យទាក់ទងការគិតនេះដែរ នាយកក្រុមហ៊ុន S. United ដែលមានគម្រោងអាជីវកម្មជាច្រើននោះ លោក មិន សេដ្ឋា និយាយទៅកាន់និស្សិតនិងសិក្ខាកាមទាំងអស់នៅព្រឹកមិញនេះថា
“មុននឹងធ្វើអ្វីមួយ ត្រូវដឹងពីគោលបំណងរបស់ខ្លួនឲ្យបានច្បាស់…តើអ្នកមានគំនិតចង់ ធ្វើអ្វី ចង់បានអ្វីជាមុនសិន នោះយើងនឹងទទួលបានលទ្ធផល”។
មិនត្រឹមតែរៀបរាប់ពីប្រវត្តិតស៊ូរបស់ខ្លួនទេ ប្រធានក្រុមហ៊ុនរូបនេះ តែថែមទាំងនិយាយតាមការសង្កេតរបស់ខ្លួន និស្សិតខ្មែរភាគច្រើនសព្វថ្ងៃនៅមិនបានកំណត់គោលដៅរបស់ខ្លួនទេ មុនចូលរៀនចាប់យកចំណេះដឹង ជំនាញនៅតាមសាកលវិទ្យាល័យ។ លោកថា អ្នកទាំងនោះ ច្រើនធ្វើការសម្រេចចិត្តតាមគ្នា ឬផ្អែកលើកត្តាខាងក្រៅតូចៗជាច្រើន ដោយមិនបានគិតពីកត្តាខាងក្នុង ថាខ្លួនចង់រៀនអ្វីទេ។
ហ៊ុន
មករា មកពីសាកលវិទ្យាល័យ បញ្ញាជា បានបង្ហាញចំណាប់អារម្មណ៍ប្រាប់ Sabay
ខណៈកំពុងស្ដាប់ការចែករំលែកបទពិសោធន៍
និងគំនិតល្អពីថ្នាក់ដឹកនាំទាំងនោះថា ” ថ្ងៃនេះ
ខ្ញុំបានទទួលចំណេះដឹងល្អៗ
ច្រើនដែលអាចជួយជាគំនិតសម្រាប់ខ្ញុំ…មានអារម្មណ៍ថាប្លែក
និងជាលើកទី១ ដែលខ្ញុំបានស្ដាប់ពាក្យទាំងនេះ…”ដូចគ្នានេះដែរ ម៉ាក សុខជា គិតថាវេទិកាព្រឹកនេះ ពិសេសសម្រាប់ខ្លួនក្នុងការកែប្រែផ្នត់គំនិតនិងការដឹកនាំខ្លួន។ និស្សិតនេះបន្តថា តាមរយៈការចែករំលែករបស់ថ្នាក់ដឹកនាំ ទាំងអស់សុទ្ធតែមានប្រយោជន៍ និងមានតម្លៃមិនអាចកាត់ថ្លៃបាន ហើយលោកជឿជាក់ថា ប្រសិនបើគ្រប់គ្នាដែលបានចូលរួម រួមទាំងខ្លួនលោកផ្ទាល់ ចាប់យកនិងទទួលយកគំនិតទាំងនេះ ប្រាកដជាអាចជួយដល់អភិវឌ្ឍខ្លួន និងប្រទេសជាតិទាំងមូលបាន។
កម្មវិធីនេះ នឹងបន្តរហូតដល់ម៉ោង ៥ ល្ងាច ដោយនៅមានថ្នាក់ដឹកនាំជាច្រើនផ្សេងទៀតនឹងបន្តមកចូលរួមចែករំលែក ដល់និស្សិតដែលបានរួម។ មិត្តនិស្សិតទាំងអស់ ក៏អាចយកឱកាសនេះ បង្កើតទំនាក់ទំនងល្អជាមួយតំណាងក្រុមហ៊ុន សហគ្រាស ព្រមទាំងទទួលបានព័ត៌មានពីឱកាសការងារដ៏សម្បូរបែបផងដែរ៕
No comments:
Post a Comment