ផ្អែកតាមរបាយការណ៍ថ្មីមួយដែលទើបតែបញ្ចេញកាលពីពេលថ្មីៗ នេះ បានឱ្យដឹងថា ក្រុមហ៊ុនយក្សផ្នែកខាងបណ្ដាញសង្គមមួយនេះ មានការងាយស្រួលក្នុងការការពារ និងសុំបដិសេធរាល់សំណើសុំរបស់រដ្ឋាភិបាលប្រទេសផ្សេងៗ ជាងនៅអាមេរិក ព្រោះថានៅអាមេរិក មានស្ថាប័នអនុវត្តច្បាប់ជាច្រើនដាក់សម្ពាធទៅលើក្រុមហ៊ុនមួយ នេះ។
របាយការណ៍ដដែលក៏បានបន្តទៀតថា គ្រាន់តែពាក់កណ្ដាលឆ្នាំនេះ មានរដ្ឋាភិបាលនៅប្រទេសចំនួន ៧០ ដែលបានសុំក្រុមហ៊ុន Facebook ឆែកមើលម្ចាស់គណនីប្រមាណ ១៧ ៩៤០ នាក់។ ក្នុងចំណោមប្រទេសទាំង ៧០នេះ មានតែអាមេរិកមួយគត់ដែលបានដាក់សំណើទៅច្រើនជាងគេ គឺប្រមាណ ពី ១១ ០០០ ទៅ ១២០០០ សុំឆែកព័ត៌មាននៅលើគណនីប្រមាណពី ២០០០០ ទៅ ២១០០០ក្នុងរយៈពេល ៦ខែពាក់កណ្ដាលឆ្នាំនេះ។
ក្រៅពីសហរដ្ឋអាមេរិក មានឥណ្ឌា (៣ ២៤៥ សំណើ) ចក្រភពអង់គ្លេស (១៩៧៥ សំណើ) និងអាល្លឺម៉ង់ (១៨៨៦ សំណើ)។ សំណើ (request) សរុបប្រមាណ ១៤ ៦០៧ ទទួលបានពីរដ្ឋាភិបាលនៃបណ្ដាប្រទេសផ្សេងក្រៅពីសហរដ្ឋអាមេរិក។
ទោះបីជាមានសំណើយ៉ាងនេះក្ដី ក្រុមហ៊ុន Facebook មិនបានផ្ដល់ព័ត៌មានរបស់ម្ចាស់គណនីទាំងអស់ដល់រដ្ឋាភិបាលនៃ បណ្ដាប្រទេសណាមួយនោះឡើយ ជាក់ស្ដែង សម្រាប់រដ្ឋាភិបាលអាមេរិក ក្រុមហ៊ុន Facebook ផ្ដល់ជូនប្រមាណ ៧៩% ដែលព័ត៌មានទាំងនោះគឺជាកាតព្វកិច្ចស្របច្បាប់ដែលក្រុមហ៊ុននេះ ត្រូវផ្ដល់ឱ្យរដ្ឋាភិបាល។
ដោយឡែក ក្នុងចំណោមប្រទេសចំនួន ៥ ដែលបានដាក់សំណើជាង ១០០០ ទៅក្រុមហ៊ុន FB ដូចជា ឥណ្ឌា ចក្រភពអង់គ្លេស អាល្លឺម៉ង់ បារាំង និងអ៊ីតាលី FB ផ្ដល់ព័ត៌មានម្ចាស់គណនីតែ ៤៩%ប៉ុណ្ណោះ៕
No comments:
Post a Comment